Muchanan a gosa di un mainta dushi di contamento di cuenta na Museum of Industry

0

Den cuadro di Siman di buki pa mucha, Museum of Industry a organisa un mainta di storia pa muchanan di 4 pa 7 aña, pa asina enfoca riba e importancia di lesamento. Dor di lesamento bo ta bira mas curioso pa sa mas di e mundo rond di bo y e ta habri bo wowo pa cosnan nobo pero tambe di nos pasado. Como e tema di siman di buki tabata “Wanta, sigui lesa, NO spanta!”e storianan tambe a refleha esaki.

Pa haci e contamento di storia un experiencia inolvidabel pa e muchanan, e museo a invita dos autor local, Sheila Werleman y tambe Emerita Emerencia. Sheila Werleman, ta un illustrador di buki pa mucha y tambe graphic designer. Dor di su experencia den enseñansa el scribi y diseña diferente bukinan dirigi special riba nos muchanan. El a conta entre otro e storia for di e buki titula “Mommy” uzando audiovisual pa asina capta e muchanan su atencion.

E di dos autor cu museo a invita ta Emerita Emerencia cu ta un artista multilingual, cu a traha den enseñansa aki na Aruba y Canada, cu tin hopi experencia den drama y musica. Emerita a combina e contamento di storia, cu e zonidonan di su tambu y drama. E muchanan y mayornan a keda impresiona di tur dos presentacion.

Na final di evento, e muchanan a haya un dushi treat pa hiba cas. Museum of Industry kier a gradici New India Insurances, Oduber Agencies Aruba y Johnson’s Supermarket pa nan sosten y ayudo pa por a haci e mainta aki posibel pa nos muchanan. E storytelling aki tabata e ultimo storytelling organisa pa e aña aki. Keda pendiente pa eventonan di storytelling den 2018.

Pa esunnan cu ta interesa pa pasa bishita Museum of Industry, e ta situa den e emblematico Watertoren na San Nicolas y ta forma parti di un constelacion di cinco museo cu ta cay bou Fundacion Museo Arubano. E museo ta relata e storia asombroso di e desaroyo industrial na Aruba den e ultimo dos siglonan, cu ta encera e industrianan di oro, aloe, fosfaat, petroleo y turismo. Ademas, den e seccion berde, e museo tambe lo exhibi e “Museum Incubator Project”, den cual proyectonan innovativo tocante desaroyo sostenibel na Aruba lo wordo exponi cu a wordo diseña door di e hubentud di e isla.

Museum of Industry ta habri di dialuna pa diabierna di 9.00am te cu 6.00pm y riba diasabra di 10.00am pa 2.00pm.

Si bo persona ta interesa pa bin cu un grupo of organisa un evento na Museum of Industry, por tuma contacto cu e museo na 584 7090 y tambe por siginanvia Facebook.

LEAVE A REPLY

Please enter your comment!
Please enter your name here