Durante un patruya di rutina, ta drenta un melding via Centrale Post pa bay cu urgencia na Eagle Beach, na altura di Marine Verlof Centru. Esaki ta relaciona cu’n hobencito di 8 aña cu tabata ariba un boto di plastic y cu a wordo hiba afo door di e coriente di lama. Despues a drenta varios melding mas relaciona cu e mesun incidente. Na nan yegada polisnan ta papia cu mama di e hobencito cu tabata den panico ya cu su yiu tabata bay mas y mas afo. El a logra conta polisnan cu e tabata canando cu su dos yiunan canto di lama hunto cu su casa. Pero su casa a bay pisca. Su yiu homber mayor a drenta den un boto di plastic y a cuminsa drief bay. Pero e momento ey toch e boto tabata cerca pero despues el a yega cerca di e boeinan, pa cual C.S. a drenta den panico y a landra bay den direccion di su yiu. Pero door di e coriente di lama y e biento tabata hiba e mucha mas leu. Dado momento e no tabata por mas y a landra bin bek tera. Eynan el a topa un persona cu a yama polis. Un catamaran di Pelican Tours tambe a pasa cerca di e mucha pero no a ripara di biaha kico ta pasando. El a purba bira bek, pero esaki no tabata facil. Mirandoc u tabata tin un boto di Guarda Nos Costa banda di Manchebo Beach a dicidi di pidi nan pa bin duna asistencia, cual a sosode rapidamente. A logra yega cerca e mucha, a pone e mucha den e boto y bin tera bek cun’e. Ora cos a calma a bin constata cu negligencia a hunga un rol den esaki. E tata na niun momento a stop di pisca, ni ora cu su yiu a regresa tera bek sano y salvo. A conseha e mama pa siguiente biaha bisti su yiu un lifevest. Ambulance tambe a presenta pero a resulta cu no ta necesario. E mama mes ta verpleegster y a constata cu e mucha no tabata tin mester di asistencia medico. Central di Polis na tur momento tabata na altura di kico tabata pasando.