Diamars anochi den careda di 10 or dilanti di Riu Antillas un mucha a cay den e buraco di riolering yena cu awa sushi. E famia a drenta accion di biaha y asina saca e mucha homber for di e buraco di e riool y a bati alarma. Polis a presenta y a mira e situacion y a informa pa ambulans presenta pa paramedico haci un control. Parce e mucha homber den compaña di famia a bay para riba e rand di e riool, pero algo a bay robes cu el a perde balans bay atras y cay den e buraco.
Personal di e hotel Riu a presenta cu plywood y material pa asina tapa e buraco aki pa evita mas accidente. E mucha homber a keda controla pa personal di ambulans. Ta trata aki di un famia pasa vakantie na Aruba, for di Hulanda.
Polis a bay informa e manager di e hotel debi cu e canal di riool aki cu ta riba e strip no ta di DOW sino di e hotel y a informanan di e incidente cu a tuma luga cu un mucha a cay den e buraco di riool.