STOCKTON, California – Mientras cu e mayornan inconsolabel di un mucha muhe di 3 aña, kende a fayece despues di un cita cu e dentista, ta spera e resultadonan di autopsia, e bisiñanan di e comunidad di Stockton, California, ta rabia y a bay protesta dilanti di e clinica, unda cu e incidente a sosode.
CBS News a reporta cu siman pasa, Aracely Avila a hiba su yiu Daleyza Avila-Hernandez pa nan saca dos djente y un kies den e Children’s Dental Surgery Center di e ciudad. Ora cu e mucha tabata tin mey ora eyden, e mama a mira cu un ambulance a yega, pero nunca el a pensa cu ta pa su yiu.
Un rato despues, un enfermera a acerk’e pa inform’e cu su yiu a haya un paro cardiaco, pero cu ya e tabata stabil y cu a transport’e pa un hospital cercano. Sin embargo, ora cu nan a yega hospital, nan a inform’e cu el a fayece.
“Unico cos cu mi a haci ta hiba mi yiu na e dentista pasobra nan lo a bay drecha su djentenan y ni 30 minuut despues, nan a trec’e morto p’ami,” su mama afligi a bisa den un entrevista na Fox News.
Tanto Avila como su casa tabata sigura cu despues di e cirugia su yiu tabata contento y saludabel.
Mientras cu e Departamento di Polis di Stockton ta sigui investiga kico por a ocasiona e tragedia aki, e casonan di morto infantil den salanan di dentista, ta sigui yama atencion.
Na 2012, e corant The Daily Mail a indica cu den algun caso, dentistanan di Merca a administra sedantenan oral na pashentnan di solamente 18 luna di edad y un fundacion cu sede na Virginia a compila cifranan cu lo a indica cu den e ultimo 15 añanan, mas of menos 31 mucha lo a muri durante of despues di tratamentonan dental.
Fuente: http://peopleenespanol.com/