Mucha di 3 aña ta muri durante un cirugia dental di rutina

0

CALIFORNIA, Merca- Mayornan di un criatura di 3 aña ta buscando contestanan desesperadamente, despues cu nan yiu muhe a muri durante un cirugia dental di rutina na California.
Araceli Avila, mama di e criatura, gewoon kier pa niun otro mama mester pasa aden. El a bisa cu un dentista na Western Dental a recomenda pa nan yiu, Daleyza, haci un ciruga dental chikito. Nan a recomen’e pa hiba nan yiu pa e Dental Surgery Center na Stockton, California.
“Tur loke mi a haci ta hiba mi yiu muhe dentista, pasobra nan a bisami cu nan lo bay drecha su djentenan. Mei ora despues nan ta trece mi yiu bek p’ami, morto”, Araceli a bisa. El a comparti potretnan di su yiu prome cu e cirugia. E tabata un mucha yen di energia y vitalidad.
“Ora cu nos a sali pa bay hospital, el a core sali mi tras, a subi den auto y e tabata feliz”, segun tata di e mucha, Jose Hernandez.

Araceli, mama di Daleyza, a sigui bisa cu e no tabata permiti pa ta paden durante cirugia, y mientras cu e tabata wardando su yiu keda cla, el a wak ambulance yega.
“Mi a lanta para y a bay pafo, pasobra mi e pensa, cu nan lo a bin busca un mucha, pero nunca mi por a imagina cu nan a bin busca mi yiu”, segun Araceli. Un rato despues, un verpleegster ta bin afo pa papia cun’e y ta bis’e cu algo a bay robes durante cirugia.
E criatura su curason a para y e verpleegster tabata puntra si kisas e mucha tabata sufri di algun problema di salud. “Mi yiu tabata masha saludabel”, Araceli a bisa.

“Esaki no ta algo facil pa trata cun’e. Mi tin casi dies aña ta haci e trabao aki, y nunca mi a yega di hayami den un situacion asina”, segun David Thompson, administrador na e Children’s Dental Surgery Center. Segun Thompson, semper durante un cirugia, tin un dentisa presente, un anestiologo y dos asistente. “Nos ta comprometi pa yuda un mucha tur dia. Esey ta nos mision, p’esey nos ta akinan. E ta algo riesgoso, no ta tur hende kier haci esaki”, el a agrega.
Pero tur loke famia di Daleyza ta pidi awo, ta contesta: con un simpel procedura dental por a caba den un tragedia asina?
“Nan no a bisa con el a muri y ni di kico el a muri”, Araceli a bisa.
Departamento di Polis di Stockton tin e caso bou investigacion.

LEAVE A REPLY

Please enter your comment!
Please enter your name here