DEN HAAG, Hulanda – Conseho di minister di reino a dicidi diabierna, 30 di Juni, pa propone mr. M.G.M. Schwengle na Su Mahestad Rey, pa e nombracion pa consehero di estado di Reino.
E lo drenta den servicio di e Raad van State di Reino den e departamento di advisering como consehero di estado pa pais Aruba. Ki tempo e Raad van State lo cuminsa, esey lo wordo anuncia despues.
Mildred (Milly) Schwengle (1964) a studia derecho na e Universidad Catolico di Nijmegen. For di 1990 pa 1992 e tabata officier van justitie suplente na Ministerio Publico na Aruba. Despues e tabata te cu 1994 griffier na Corte di Prome Instancia. Na 1994 el a avansa pa abogacia. Desde 1999 e ta managing partner na HBN Law na Aruba.
Mr. Mildred Schwengle lo sigui dr. Mito Croes (dfm) como consehero di estado di Reino pa Aruba, kende tabata te cu dia 1 di Juni 2016 como consehero di estado pa Aruba y despues a fayece no mucho tempo despues.
E departamento di advisering di Raad van State di Reino ta reuni un biaha pa luna riba diaranson y ta conseha riba e puntonan cardinal di e mesun asuntonan cu e departamento di Advisering di Raad van State. Den Raad van State di Reino, ta trata asuntonan cu no solamente ta regarda Hulanda, sino henter Reino: leynan di reino, medidanan general di maneho di reino y acuerdonan di reino.
Den e departamento advisering di Raad van State di Reino, tin miembronan di e departamento aki di Raad van State hunto cu e miembronan cu ta wordo apunta pa e otro paisnan den Reino.
Fuente: www.raadvanstate.nl