Kralendijk, BONEIRU- MPB ta felisitá partido D66 ku a gana elekshon pa Tweede Kamer na Boneiru. MPB ta kontentu ku e resultado di elekshon pa Tweede Kamer mirando ku ta bai tin un kambio di gobièrnu hulandes ku lo bai ta mas na fabor di Boneiru ku partisipashon di partidonan manera D66 i CDA ku tin kurason kalor pa Boneiru. MPB ta felisitá partido VVD ku a gana elskhon pa Tweede Kamer na Hulanda i huntu ku D66 i CDA kasi sigur lo forma e base pa un koalishon nobo huntu ku un di 4 partido ku por ta GroenLinks of Christen Unie.
Inkluí puntonan di prioridat den programa di gobernashon
MPB ta sumamente kontentu ku partidonan ku tin kurason kalor pa Boneiru manera D66 i CDA pero tambe GroenLinks a saka respektivamente 19, 19 i 14 asiento. Boneiru a konosé 4 aña di gobernashon di Hulanda kaminda tin kambionan a tuma lugá na Boneiru manera entre otro ariba tereno di salubridat, enseñansa i kuido pa grandinan. Di otro banda tin puntonan klave, manera e rapòrt di evaluashon Spies ta menshoná, ku tambe mester di atenshon rápido. Por ehèmpel nos forsa di kompra general pero partikularmente e penshon, e sueldo mínimo i mihó fasilidat pa mamanan soltero. Rapòrt Spies ta papia palabra kla tambe ku mester mehorá nos siguridat, mester di mas i mihó kas pa pueblo i no papia mes di nos kareteranan ku ta den hopi mal estado. MPB huntu ku demas miembronan di koalishon inkluyendo oposishon tambe lo pone puntonan di prioridat i trese esakinan na konosementu di e partidonan hulandes ku lo bai forma parti di un koalishon nobo, pa asina nan inkluí Boneiru su puntonan di prioridat den e Programa di Gobernashon di e gobièrnu nobo di Hulanda.
Kita retraso sosial
MPB ta felisitá pueblo Boneriano ku a sa di bai vota ayera pa elekshon di Tweede Kamer. Gobièrnu di Boneiru pero tambe esun di Hulanda tin un tarea hopi importante pa respetá i konkretisá e rekomendashonnan deskribí den rapòrt di evaluashon Spies. MPB ta kere ku e ánimo pa vota pa elekshon di Tweede Kamer lo ta muchu mas haltu aki 4 aña ku si den e próksimo 4 aña di e gobernashon nobo di Hulanda aki nos logra kita retrasonan sosial ku tin e pueblo Boneriano basta molestiá. Pueblo Boneriano sigur ta agredesido i parsialmente kontentu ku loke Boneiru a logra den algu mas ku 6 aña siendo parti di Hulanda pero den e mesun rosea pueblo Boneriano ta eksigí pa su situashon sosial mehorá meskos ku Hulanda a mehorá entre otro Servisio di Impuesto, Servisio di Duana i Servisio di Brantwer.
Ora a yega pa negoshá ku Hulanda
Ku un gobièrnu di Hulanda nobo na kaminda ku partisipashon di partidonan ku tin un kurason kalor pa Boneiru MPB ta kere ku e ora a yega ku gobièrnu di Boneiru mester eksigui e kompromiso di e Gobiernu Hulandes nobo pa habri portanan di negosashon nobo pa durante e 4 añanan binidero di gobernashon nos por logra ehekutá e puntonan di rekomendashon di rapòrt Spies pero partikularmente mehorá nos penshon, nos sueldo mínimo, nos kasnan di pueblo i nos kayanan.