Désirée Coffie, di e Frakshon MPB y Esther Bernabela, di e Frakshon Bernabela, a manda un karta pa e presidente suplente di Konseho Insular di Entidat Publiko Boneiru, sra. Evelina Betancourt-Anthony, riba e petishon cu e frakshonnan MPB-Bernabela di sosten nashonal pa gobernashon di Boneiru.
E karta ta bisa lo sigiente:
Apresiabel sra. Betancourt-Anthony,
Frakshon di MPB i Frakshon Bernabela a tuma nota di un karta ku a sali for di Frakshon di Demokrat ku e petishon pa sra Betancourt-Anthony komo presidente di Konseho Insular fungi komo fasilitadó ku lidernan di frakshon di Konseho Insular pa yega na un gobièrnu nashonal mirando e echo ku tin instabilidat ya pa un tempu kaba.
Na prome bista e intento di Frakshon di Demokrat liderá pa sr Robby Beukenboom ta mustra masha simpátiko pero ora nos analisá e situashon mas profundo nos ta konkluí lo siguiente:
1: Gezaghèber komo presidente di Konseho Insular mester para tur momento haltu riba polítika i no por funshoná komo fasilitadó òf formadó di ningun gobièrnu;
2: No ta lidernan di frakshon den Konseho Insular ta forma un koalishon. Ta partidonan polítiko ku sosten di nan direktiva i otro órganonan ofisial di partido ta hasi esei. Lógikamente un frakshon independiente lo tin su propio seno tambe;
Nos ta kompartí e pensamentu ku ta reina un instabilidat polítiko den Konseho Insular. Nos ke enfatisá ku gobernashon sí ta kanando i Kolegio Ehekutivo ta tuma desishonnan i hasta na e momentunan aki Diputado Den Heyer ta na Hulanda hibando varios deliberashon. Ta p’esei mes Frakshon di MPB i Frakshon Bernabela ta aploudí e aserkamentu di Frakshon di Demokrat pa trata na yega na un UNION den Konseho Insular pa sali na interes di pueblo di Boneiru.
Frakshon di MPB i Frakshon Bernabela ta hasi un yamada serio na sr Beukenboom pa ora mester trata lei, regla i moshonnan den Konseho Insular pa krea KONSENSO pa ku sosten na e gobernashon aktual, pa asina krea un base mas AMPLIO ku e koalishon di minoria di MPB-Bernabela i kisas hasta por yega na un sosten NASHONAL di 9 miembro ku lo sostené e gobernashon aktual. Nos ta konsiente ku Partido Demokrat tin “e hende” pará sentral. P’esei mes Frakshon di MPB i Frakshon Bernabela no tin duda ku Frakshon di Demokrat lo sa di lanta para ariba di polítika partidista na interes di pueblo Boneriano.