SAN FRANSISCO, Merca- Un tribunal di Merca a determina cu e herbicida Roundup di e compania Mericano di simiya y fertilisante tabata un “factor substancial” den e aparcion di cancer terminal di un hardinero.
E Tribunal Superior di San Fransisco, na California diabierna a obliga e compania Mericano di simiya y fertilisante Monsanto na paga mas di 289 miyon dollar na e hardinero Dewayne Johnson, kende a wordo diagnostica cu cancer terminal despues di a uza productonan di e compania, segun AFP.
Segun e hues, e herbicida Roundup cu ta wordo uza den productonan di e marca aki ta un “factor substancial” den e aparicion di e cancer cu e hardinero ta sufri di dje.
E demanda di Johnson ta e prome demanda contra Monsanto cu ta yega huicio entre tur e denuncianan cu e herbicida Roundup, uza door di e compania den su productonan tin efectonan cancerigeno debi na e presencia di glifosato. E ingrediente aki a wordo declara cancerigeno tres aña pasa pa e Agencia Internacional pa investigacion di Cancer di e Organisacion Mundial di Salud.
Di su banda, Monsanto ta sali na defensa di su productonan y ta nenga cualkier vinculo cu Roundup y a anuncia lo apela e veredicto den tribunal.
Sin embargo, huradonan ta considera cu e compania ta na altura di e efectonan peligroso di su productonan y no a adverti e consumidornan di e riesgonan aki, pa cual el a “actua di mala fe”.
Dewayne Johnson a wordo diagnostica cu lynfoma na 2014, ora cu e tabata tin 42 aña. E hardinero tabata uza Roundup y otro producto di Monsanto, Ranger Pro, den su labornan como gerente di pestcontrol den un distrito escolar di San Fransisco.