WASHINGTON D.C., Merca – E exstagiaire di Cas Blanco, cu a bira famoso door di a mantene un romance cu Bill Clinton, Monica Lewinsky, a carga dialuna, contra e fayecido Roger Ailes, fundador di Fox News, y a considera cu e cadena awor por ta “husto y ekilibra” tras di su morto cu a sosode diahuebs.
Lewinsky a acusa Ailes di a fomenta un “cultura di humiliacion” na momento di lansamento cu Fox News, na 1996, cu tabata tin su prome exito cu e cobertura di e escandalo pa su relacion cu e expresidente.
“Dos aña despues cu Rupert Murdoch a designa Ailes como director di e canal nobo di noticia, mi relacion cu e presidente Bill Clinton, a bira publico,” Lewinsky a skirbi dialuna den un editorial di New York Times.
“Ailes, un antiguo colaborador politico di e Republicanonan, a tuma e historia di e romance y e huicio cu a sigui y a sigura cu su presentadornan lo mustra sin pauze, 24 ora pa dia. El a funciona como magia: e noticia a atrae televidientenan y a haci nan leal na Fox,” Lewinsky a bisa, kende a destaca cu Fox News a converti den e cadena number 1 di Merca desde e tempo ey.
Segun e editorial, e cobertura cu e cadena a haci di e trabao di fiscal Kenneth Starr na 1998, a mescla “berdad cu ficcion.”
“Mi a stop di ta un persona cu dimension. En cambio mi a converti den un prostituta, un obheto sexial of pio,” e ex stagiaire a splica. “Dianan prome di a lansa e noticia, Fox a pidi su televidentenan cu ta vota, si Monica Lewinsky tabata un “mucha muhe normal”, of un “hoben buscabida en busca di emocion,” el a agrega.
“Su soño tabata mi pesadiya. Mi caracter, mi apariencia y mi bida a wordo poni bao di scrutinio sin piedad. Berdad y ficcion a mescla aleatoriamente na e servicio di mayor rating,” el a continua.
Pero awo e activista contra cyberbullying tin speransa pa e futuro di Fox: “Tin señalnan positivo cu e generacionnan hoben na Fox, James y Lachlan Murdoch, kier cambia e cultura crea pa Aisles.”
“Mi ta spera cu Murdoch compronde cu e Mericanonan ya no ta bay tolera un cultura corporativo cu ta mira odio y humiliacion como parti di un negoshi periodistico exitoso,” el a considera.
Lewinsky a traha como stagiaire den e Oficina di Asuntonan legislativo di Cas Blanco entre 1995 y 1998. Durante e añanan ey, el a mantene un relacion extramatrimonial cu e presidente Bill Clinton, cu a wordo revela na 1998, provocando un escandalo sin precedente y a duna inicio na un huicio mediatico cu tabata den centro di tur atencion.
Na principio, Clinton a nenga e relacion aki, pero e huicio a demostra cu si esaki a existi. E ora ey, e Lower Chamber di Congreso a destituy’e pa perhurio y despues a wordo absolvi pa e senado na Februari di 1999.
Fuente: http://www.infobae.com