Aruba ta sigui e pasonan di nos representante Srta. Charlene Leslie di cerca pa loke ta su participacion na e certamen Miss Universo cu ta tumando luga na Filipina. Ademas di tin contacto cu nos representante mes, ta sigui tur e desaroyonan di e certamen riba rednan social manera Facebook y Instagram y aki ta unda cu nos ta riparando cu e popularidad di Charlene ta aumentando dia pa dia. Hopi di e comentarionan ta referi na e estatura y elegancia di Charlene y cu e ta luci bunita na tur momento.
Ya caba tabatin e prome presentacion den trahe di baño Yamamay y nos reina a impone, saliendo den e lista di candidatanan cu miho curpa. E lista aki a wordo traha pa missologonan cu tur aña ta sigui e certamennan internacional di serca y nan tambe ta menciona nos representante como un di e candidatanan fuerte pa e certamen.
Miss Aruba a wordo scogi tambe pa forma parti di un bishita na e ciudad Baguio unda cu e candidatanan a wordo ricibi cu un ceremonia oficial, sigui pa un parada den e cayanan di Baguio. Charlene a comenta cu Filipina ta un pais hopi bunita y cu hendenan hopi amabel y cariñoso. Apesar cu candidatanan ta haya mas o menos 3 ora pa drumi pa dia, e gana y motivacion pa sigui traha ta halto.
Tur hende ta keda invita pa sigui nos Miss Aruba su pasonan via su rednan social riba facebook (Charlene Leslie y/of Miss Aruba Pageant) y tambe Instagram (@charleneleslie).
Dentro di algun dia ta sali un delegacion chikito pa mustra apoyo na nos Miss Aruba na Filipina. Keda pendiente pa mas update cu lo sigui comparti cu Aruba completo.