Bou di su capa di nubia diki, Jupiter por a mantene su secretonan. Pero aworaki, e prome resultadonan di e mision Jun di NASA ta desafiando e creencianan di investigadonan tocante e planeta gigante aki.
E resultadonan a wordo revela durante un teleconferencia diahuebs cu e investigaonan di NASA y cualnan a wordo publica den e revista Science y Geophysical Research Letters.
Juno a cuminsa na Augustus 2011, pero e no a yega Jupiter te cu Juni 2016. E nave ta orbitando e planeta y realisando calculonan di vuelo di reconocimento over di e nubianan.
E sobrevuelonan, observacion y datonan ta mustra polonan di Jupiter manera nunca antes a yega di wordo mira. E ovalnan briyante den e polonan ta revela ciclonan gigantesco cu por yega te 1.400 km di diameter. Juno tambe por a sondea e capa di e nubianan y a descubri poznan di amoniak cu ta forma sistemanan meteorologico gigante y violento den e atmosfera profundo.
Pero e amoniak aki no ta mescla constantemente, manera cu investigadonan semper a kere. E ciclonnnan gigante den e polonan tambe ta algo nobo pa e investigadonan.
“Nos ta desconcerta riba con nan ta wordo forma, con stabiel su configuracion y pakico e polo noord di Jupiter no ta mescos cu e zuid- pool”, segun Scott Bolton, investigado principal di e mision Juno. “Nos ta puntrando nos mes si esaki ta un sistema dinamico y cu nos ta mirando un capa so, y durante e proximo aña nos lo wak’e disparce, of si ta trata di un configuracion stabiel y e tormentanan aki ta circula un rond di otro”.
Juno a revela cu e campo magnetico di Jupiter ta 10 biaha mas cu di Mundo y dobel di e fuerte di loke a wordo anticipa, superando e expectativanan di investigadonan.
Juno a hay atambe auroranan grandi di Jupiter, capta riba imagennan ultravioleta y infrared, y un awasero di electrones cu lo por ta su origen,
Aunke cu Jupiter ta e planeta mas grandi di nos sistema solar, astronomonan no sa mucho di su origen. E mision Juno a wordo diseña pa revela e origen y evolucion di e gigante gaseoso. su otro ohbetivonan ta inclui e.o. midi e cantidad di awa y amoniak den su atmosfera y haya evidencia di un nucleo solido.
Jupiter ta probablemente e prome planeta cu a wordo forma den e sistema solar y haya sa mas di dje lo por contribui cu un mayor conocimento riba e inicio di sistema.
Juno ta e di dos nave espacial cu ta orbita Jupiter. E prome tabata Galileo cu a orbita e planeta entre 1995 y 2003.
E mision lo termina na 2018, ora cu e nave dal den e planeta pa impedi cu e causa daño na e lunanan di Jupiter.
Fuente: www.theguardian.com