Exactamente 35 aña pasa, riba e fecha di 20 di December 1981, un vision a bira realidad y a habri e Museo Arqueologico di Aruba na Zoutmanstraat 1 pa asina expone y presenta Aruba su herencia cultural arqueologico na publico. Esaki tabata algo grandi pa Aruba como tambe pa Caribe, pasobra Museo Arqueologico Aruba tabata un di e prome museonan arqueologico den e region aki.
Tanto publico local como e bisitante internacional por a disfruta di e coleccion creciente y informacion di nos antepasadonan dje ultimo 35 añanan, como tambe di un programacion publico amplio y diverso. Cu hopi animo y ya pa hopi aña Museo a ofrece programanan educativo pa scolnan, programanan recreativo den periodo di vacacion, como tambe actividadnan diverso pa bishitantenan di tur edad y actividadnan enfoca specialmente riba famianan.
Alabes diferente investigacion cientifico cu resultadonan interesante a tuma lugar y hasta a cambia cierto parti di historia di nos antepasadonan. A forma diferente ‘partnerships’ cu institutonan local y internacional, cual colaboracionnan a eleva Museo na un nivel mas halto (den e ambito nacional como tambe internacional?). Na aña 2009 a logra un ‘milestone’ hopi importante ora cu despues di hopi ana a concretisa un siguiente paso den nos vision y a habri Museo na e ubicacion nobo y historico situa na Schelpstraat 42, cu salanan di exposicion innovativo.
Museo Arqueologico Aruba ta felicita y gradici un y tur cu den transcurso di e añanan na un of otro forma a aporta y a sostene Museo.
Pa e dianan di fiesta Museo Arqueologico ta cera pa publico di dia 24 di December te cu dia 26 di December y di dia 31 di December te cu dia 1 di Januari. Riba dia 23 di December y 30 di December, como tambe dia 2 di Januari, Museo ta habri cu orario adapta na dia di fiesta cual ta di 10 am pa 2 pm. Museo Arqueologico Aruba ta desea henter comunidad di Aruba un Bon Pasco y Feliz 2017!