Diahuebs ultimo pasado Minoushka Farro exitosamente a presenta resultado di su investigacion cu el a haci pa obtene e titulo ‘Bachelor of Arts’ di e programa academico Organization Governance & Management (OGM) di Universidad di Aruba. El a haci e presentacion dilanti di un comision di graduacion cu tabata consisti di su tres supervisornan cu ta drs. Angelo Brete, dr. Mieke de Droog y drs. Kathy Paskel. El haci su investigacion den un organisacion publico cu tin hopi contacto cu cliente y meta di esaki tabata pa identifica e pasonan strategico cu e organisacion lo por tuma pa sigui mehora su servicio, eficiencia y ta mucho mas efectivo den realisa su metanan. E interes di studiante Farro pa e investigacion aki a surgi for di e necesidad cu cada individuo den un comunidad mester ricibi e mesun bon servicio di un entidad publico, cu nan lo por ricibi di un compania den sector priva. Pa efectua e investigacion, e studiante a diseña un cuadro teoretico cu a sirbi pa colecta y prueba data pa asina por saca conclusionnan basa riba modelonan existente di maneho strategico di organisacionnan.
E organisacion a ricibi e studiante cu man habri pa nan por haya conseho obhetivo riba un nivel academico y den esencia e studiante ta conseha esnan den posicion di maneho pa uza structura di un organisacion como strategia pa mehora su eficiencia, efectividad, productividad y intergridad. Den comunidadnan chikito manera esun di nos e poder ehecutivo (y den terminologia publico, e poder politico) tin lasonan mucho directo riba e funcionamento di un departamento y esaki por tin como consecuencia cu e maneho diario ta wordo impedi y finalmente por atacha e integridad di un gobernante mes, sin tin mester. Un otro conseho di Minoushka Farro den casonan similar ta pa defini e rolnan mihor, den cual e poder ehecutivo ta keda encarga pa establece e maneho na nivel nacional pero ta independisa e ehecucion di e maneho door di crea un distancia den e dos structuranan cu lo por evita un laso demasiado estrecho entre nan, pero ta duna suficiente espacio pa e organisacion publico wordo maneha efectivamente den serivicio na comunidad na un forma eficiente. E graduado nobo di e estudio di OGM a gradici gerencia y empleadonan di e organisacion publico pa e oportunidad pa haci e investigacion aki cerca nan. Finalmente miembronan di e comision di graduacion a felicita Minoushka pa e esfuerzo cu e la haci y a elabora riba nan admiracion cu nan tin p’e pa su determinacion durante ehecucion di e proyecto aki y particularmente cu el a demostra di por a haci esaki riba un nivel academico. Decano di e facultad, drs. Tim Croes a haci entrega di e diploma na e graduado. Universidad di Aruba, particularmente e departamento di OGM ta felicita e comunidad academico, amigo, famia y conocirnan pa e logro di Minoushka Farro.
Pa mas informacion riba e estudio OGM, bishita e pagina di web di Universidad di Aruba na http://www.ua.aw/OGM y e pagina di Facebook cual ta
https://www.facebook.com/pages/University-of-Aruba-OGM-Organization-Governance-Management-FAS/