Despues di e incidente den Parlamento di Corsou y detencion di Parlamentario di MFK, Jacinta Constancia diahuebs ultimo, Ministerio Publico a duna orden di prolongacion di e detencion di e parlamentario cu 8 dia mas. Mientras tanto hues comisario a husga e detencion y prolongacion di encarcelacion. Segun cu tin di compronde for di Ministerio Publico, tur cos tabata na ordo y a husga esaki como corecto.
Mientras tanto Landsrecherche Corsou ta sigui cu su investigacion. Esaki ta a base di e maltrato cu a tuma luga contra di parlamentario y ex presidente di Parlamento, Giselle McWilliams di MAN. Segun cu nos por a mira riba un video cu a keda publica riba Facebook, comentarionan tabata sin fin condenando e hecho aki como uno repudiabel. Aki riba por a mira claramente cu e demas parlamentarionan a presencia esaki, sin reacciona den ningun manera. Si por a mira un presidente di Parlamento Pisas cu tabata riba su punta, mester a cancela e reunion te proximo aviso. E demas partidonan cu tabata t’ey presente a condena e hecho aki como un bochornoso y hasta tin cu bisa cu lider di partido MFK a sali na defensa di Constancia, kende despues di e hecho, a declara na prensa cu e lo bay pidi disculpa personalmente na McWilliams, kende, absolutamente a condena esaki, bisando cu e bofta cu el a haya, no ta p’e, sino pa e pueblo di Corsou. Nos lo keda pendiente pa e proximo 8 dianan di e resultado di e detencion aki y kico hues comisario lo bay dicidi riba esaki.