DEN HAAG – Minister Plenipotenciario Juan David Yrausquin a sigui cu hopi interes e debate den Tweede Kamer awe diamars 28 di Maart riba e resultado di eleccion pa un Parlamento nobo cu a tuma luga na Hulanda 15 di Maart ultimo. Despues cu den e prome tanda e partidonan a duna na bista y comentario riba e resultado di eleccion, tabata na “verkenner” Edith Schippers pa hiba palabra basa riba su rapport y tambe loke a keda remarca door di e politiconan di e diferente partidonan politico. Despues Tweede Kamer a vota pa Edith Schippers bira informador pa un siguiente coalicion y cu e lo cuminsa combersacionnan cu lider di e partidonan VVD, CDA, D66 y Groenlinks pa mira si e por yega eynan.
Durante su presencia na e debate den Tweede Kamer, minister Yrausquin a haci uso di e oportunidad pa saludo y intercambia cu diferente politiconan, manera presidente di Tweede kamer Khadija Arib, Sybrand Buma di CDA y Alexander Pechtold di D66.