DEN HAAG – Minister Plenipotenciario Juan David Yrausquin durante di un reunion na Gabinete di Aruba awe diasabra 17 di December a cera conoci cu e team di mentornan cu ta guia nos studiantenan na Hulanda. E mandatario a cuminsa na felicita e mentornan pa e hecho cu e aña aki un porcentahe grandi di studiantenan a caba nan estudio cu exito. ‘Mi ta gradici boso, pasobra mi ta convenci cu parti di e exito aki ta debi na e guia cu boso a duna nos studiantenan,’ asina sr. Yrausquin a bisa.
Fuera di esaki Minister Yrausquin a bisa cu awe el a bin pa cera conoci, pero principalmente pa scucha di e mentornan nan experiencia cu nos studiantenan. Tambe sr. Yrausquin a añadi cu e ta hopi interesa den tende cual meta por wordo realisa a corto plazo y cual otro metanan por tin pa traha riba dje pa un periodo mas largo.
E mentornan a introduci nan mes. Algun tin ta haciendo e trabao aki ya caba pa 27 aña y hopi di nan ta traha den e mundo di enseñansa. Durante di nan introduccion e mentornan a trece dilanti asuntonan cu nan ta enfrenta den nan guia di nos studiantenan. Nan tur a trece e puntonan aki bou atencion di Minister Yrausquin.
E mandatario a gradici e mentornan pa nan honestidad y nan preocupacion pa e bienestar di nos studiantenan. Sr. Yrausquin a bisa di a scucha bon loke ta e problema y cu esakinan tin su atencion.