Minister Xiomara Ruiz-Maduro: Cu e reforma fiscal e sistema di impuesto lo ta mas facil y practico

0

Minister Xiomara Ruiz-Maduro durante conferencia di prensa di Gobierno a duna di conoce cu e Reforma Fiscal ta hopi importante pa e bienestar di nos Pais. Ora cu Gobierno a introduci e ‘Crisisheffing’ a trece dilanti di biaha cu esaki lo ta temporario. E mandatario di Finansa a splica cu e motibo pa cua e ‘Crisisheffing’ ta temporario ta pasobra Gobierno lo introduci e Reforma Fiscal .
Pa cu e maneho nobo di Gobierno aki, ya tin avansenan significato den trabaonan y estudionan cu a wordo haci pero no tin decisionnan concreto cu a wordo tuma ainda. Reforma Fiscal ta e coleccion di e cantidad di impuesto cu tin aki na Aruba y pone nan den un solo impuesto. E manera di cobra e impuesto aki tambe ta cambia. E sistema di Reforma Fiscal lo bira mas husto y mas simpel.
Minister Ruiz-Maduro a indica cu Gobierno a busca e experticio di institutonan financiero entro otro IMF y Cartac. Cartac ta un organisacion regional cu lo yuda Aruba den e proceso aki. E trabou cu mester haci pa transforma e sistema di impuesto ta grandi y nos mester di e ayudo di expertonan riba e tereno aki pa asina pronto Aruba por conoce un sistema nobo di impuesto, esta e Reforma Fiscal.
E mandatario a expresa cu ta un revision completo lo wordo haci den nos sistema di impuesto. Esaki ta un ehercicio grandi pa yega na un producto final na unda ta bira mas facil y practico pa Gobierno trece aden placa di impuesto. Tambe cu e sistema aki, Departamento di Impuesto por cobra e impuesto na un forma mas facil. Den otro palabra tur esnan cu ta haci uzo di e sistema aki, incluyendo e consumidor y comerciante, por hacie na un forma mas facil.
“Esaki no solamente ta palabranan den aire. Gobierno ta trahando riba e Reforma Fiscal. Gobierno a bisa desde inicio cu e ’Crisisheffing’ ta uno temporario mientras nos ta pasa over di un periodo di crisis cu tin awo na nos pais. Un crisis cu a wordo ocaciona pa motibo cu largo tempo no a tuma e desicionnan cu mester a wordo tuma pa e Gobierno di AVP. Awo aki Gobiernio di Aruba ta trahando y e prome reunionnan a cuminsa”, Minister Ruiz-Maduro a duna di conoce.
Minister Xiomara Ruiz-Maduro a enfatisa cu asina cu tin e prome resultadonan di e trabounan cu ta wordo haci, lo trece informa pueblo tambe pa medio di prensa pa asina tur por ta na altura di e trabaonan cu ta wordo haci pa e cambio aki tuma luga mas pronto posibel.

Comments

comments