Diahuebs ultimo Minister di Finansa, Asuntonan Economico y Cultura señora mr. Xiomara Ruiz-Maduro tabata na e Terminal di Crusero di Aruba Ports Authority pa haci e apertura di e exposicion di e lens y mecanismo restaura di e Faro di Westpunt.
Un poco di historia, e faro a wordo construi mas of menos 100 aña pasa, despues cu na aña 1891 e barco The Californian a dal e barancanan na Westpunt. Mirando cu e tabata den hopi mal estado, na aña 2012 e faro a wordo proteha como monumento y a cuminsa traha riba un plan di restauracion. A cuminsa fin di 2015 cu e restauracion y na september 2016 a tuma lugar e apertura di e faro despues di a wordo completamente restaura.
E meta principal di e exposicion aki ta pa comparti informacion tocante e California Lighthouse caminda cu bishitantenan por admira e Lens original di mas cu cien aña bieu. Cu e ayudo di studiantenan di EPI y un specialista boluntario di Hulanda a logra restaura e mecanismo y e Lens y awor esakinan ta exponi den e terminal crucero hunto cu informacion di e faro y museonan cual ta keda den edificionan monumental y unico di Aruba, asina nos bishitantenan ta cera conoci mas cu e historia y cultura di nos Pais. Minister di Cultura señora Ruiz-Maduro den su discurso a gradici tur boluntario y specialmente studiantenan di EPI pa e bunita trabao realisa y a trece dilanti cu awor e faro ta manda luz di guia pa nos y nos bishitantenan por siña conoce mas di nos cultura y identidad, pasobra nos cultura nos mester bib’e.