“Comunidad a perde confiansa pa Gobierno por representa nan y tuma desicion den nan interes y interes di pueblo en general”, asina parlamentario Marisol Lopez-Tromp a cuminsa su conferencia di prensa.
E parlamentario ta basa su mes riba e hecho cu ultimo simannan tanto e mes como su coleganan a trece dilanti cu tin desconfiansa den e maneho di e minister di infrastructura, caminda cu e mandatario lo ta otorgando terenonan contra ley of no ta controla kico ta sosodiendo den y rond di su ministerio pa loke ta otorgamento di tereno den areanan prohibi pa ley.
E siman aki minister Arends a trece dilanti cu e lo pone un stop riba supermercadonan nobo pa 2 aña. Parlamentario Tromp ta referi na esaki como algo positivo pero ta lamenta cu ta awo numa Gobierno kier bay tene cuenta cu esaki. Despues di 8 aña di gobernacion, Gobierno kier bay tene cuenta cu e Ley di Ordenansa Teritorial, esta e Ruimtelijke Ordenings Plan (ROP), mientras cu e ley aki ta vigente desde 2007 caba. Den e ley aki ta ancra cu tin areanan riba nos pais cu pa ley ta destina pa cierto actividadnan. Tin areanan comercial, areanan pa naturalesa, areanan pa vivienda y areanan pa diferente tipo di actividad.
Awor direpiente minister Richard Arends kier pone un stop na otorgamento di permiso pa loke ta construccion di supermercadonan den bario. Ta straña parlamentario Lopez-Tromp cu den 8 aña di gobernacion ningun minister a uza e ley di ROP manera ley ta prescribi. No tin nada nobo den loke minister Arends ta anuncia. No tin maneho nobo pasobra e ROP ta di Gobierno y ta ancra den ley desde 2007. Realidad ta cu Gobierno a viola su propio maneho pa 8 aña largo.
Awe tin un minister nobo berdad cu ta pone enfasis y ta bisa cu crecemento a bira desproporcional y a double up na 1 supermercado pa cada meter cuadra.
No ta supermercadonan so a conoce un desaroyo den bario desproporcional. Habitantenan den bario ta keha cu a bin fabrica, negoshinan cu ta conflictivo cu e meta residencial di e barionan.
Habitantenan a sclama pa añanan pero e gobernantenan cu tin e hermentnan den nan man cualnan ta minister Sevinger y minister Arends, no a haci net net nada. Nan tin e den nan man pa duna of nenga un permiso y te cu awo nan no a haci nada. Gobierno ta papia di un ROP den cual nan lo por regula y controla na unda ta duna permiso pa un negoshi. Nada nobo, segun Lopez Tromp. E ley di ROP ta existi tur e añanan aki caba pero awo direpente ta pone enfasis riba dje; awor prome cu eleccion.
Tambe minister ta bisa cu pa loke ta erfpacht, e destinacion mester cuadra cu e actividad di e negoshi prome cu entrega permiso. Nada nobo, esaki ta logico, segun Lopez Tromp. Esey ta loke bon gobernacion ta encera. Pero awo direpiente na vispera di eleccion e minister a corda cu e ley aki ta existi y kier anuncia esaki manera cu ta un ley nobo esaki lo ta. E no ta un maneho nobo y ta un ley cu Parlamento a aproba na 2007 caba. Mester bisa cu minister Arends a anuncia cu den e ley di hinderverordening tin un lista di actividadnan cu no ta permiti den areanan residencial. Nada nobo, segun Lopez Tromp. Di otro banda e parlamentario ta contento si cu minister Arends a pone enfasis riba e ley aki pero su mesun colega minister ta viola e ley aki tur dia y ta parti permiso pa loco cu no ta cuadra cu e meta di areanan residencial. Minister Sevinger ta poniendo bisiñanan pleita, ta pone
famianan rabia y ta pone hendenan lanta caso contra e propio Gobierno cu tin e ley den nan man pa proteha derecho di tur ciudadano.
Minister Sevinger gusta busca buraconan den ley y instrui ambtenaarnan den su departamento pa tambe uza buraconan den ley pa asina haci cosnan contra ley. E minister ta duna opdracht na ambtenaarnan pa actua contra ley. Ambtenaarnan t’ey pa proteha ley y actua segun esaki. Esey ta bon gobernacion. No cu un minister ta haya ta bon pa challenge ciudadanonan y pone esakinan bay corte y ponenan cana un caminda di cruz pa busca nan derechonan cu e mesun minister aki tin e deber di proteha. Pero no, e minister aki hunto cu algun di su ambtenaarnan ta busca tur sorto di buraco den ley pa desvia di e propio leynan cu nan tin cu cuida.
Por ultimo parlamentario Lopez Tromp kier a informa comunidad cu un minister por stipula un maneho nobo ora e sinta. Ora bo bira gobernante bo por stipula bo maneho y adapta esaki na caminda. Tambe por introduci cosnan nobo na bienestar di pueblo. Pero pa despues di 8 aña, na vispera di un eleccion, na momento cu practicamente bo mester pone e pen un banda y respeta loke pueblo ta bay bisabo e sigiuente eleccion pa e ora ey esun cu ta siguibo lo bay stipula su maneho, no ta e momento pa bin cu maneho nobo. Y esaki ta loke hustamente varios minister ta core haci awor den pura. Minister Dowers y minister Sevinger pa menciona algun. No ta existi maneho nobo den e ultimo simannan prome cu bay urna electoral. B’a eherce bo maneho, of bo falta di maneho caba tur e añanan y nunca Parlamento a haya documentacion cu ta defini e maneho di e ministernan. Despues di 8 aña ta un hilaridad pa bay introduci manehonan nobo na vispera di eleccion y ta increibel cu mester yega asina leu cu ciudadanonan ta hiba Gobierno cada rato corte paso e gobernantenan mes ta violando e mesun leynan cu nan mester proteha. Y esaki ta e motibo cu pueblo a perde tur confiansa den e gobernantenan actual y kier un cambio.