Minister Schwengle cu un treat pa e heroenan di tur dia

0

Relaciona cu celebracion di Dia di Tata diadomingo, teniendo cuenta di e trabou ocupa cu nan tin tambe, Minister di Salud Publico, Cuido di nos Grandinan y Deporte, Dr. Carlos “Alex” Schwengle, a pasa bishita e heroenan di tur dia na IMSan, na Servicio di Ambulance. Na prome luga pa yama nan danki pa e bon trabou cu nan ta desplega y na di dos luga pa felicita tur e tatanan riba nan dia.

Pa esey e mandatario a trece un desayuno saludabel pa tur, algo cu nan a aprecia masha. E nursenan a probecha e desayuno den pura, pasobra un rato despues a bira ocupa y ambulancenan mester a sali mesora pa casonan di emergencia.

Minister Dr. Schwengle a subraya cu mamanan ta hopi importante, pero tata tambe. “Traha yiu ta un cos, esey no ta haci Bo tata, cria un yiu…esey ta e tata. Tata ta esunnan cu t’ey tur dia pa nan yiunan y dunando bon ehempel pa sigui riba e bon caminda den nan bida”, asina e mandatario a duna di conoce.