Club Kibrahacha 60+ a tene nan celebracion tradicional di dia di mama y Minister di Salud Publico, Cuido di Nos Grandinan y Deporte, dr. Carlos “Alex” Schwengle tambe tabata presente. Club Kibrahacha 60+ a organisa e celebracion cu hopi amor y e tabata hopi trabou, unda cu a atende 250 pa 270 persona.
Ta basta hende grandi tabata presente pero tambe e yiunan a bin acerca. “E ta asina bunita pa mira. Un palabra di elogio pe directiva di Club Kibrahacha cu ta haciendo un tremendo trabou aña den y aña afo”, Minister Schwengle a remarca. Ta spera cu comunidad y gobierno por duna Club Kibrahacha 60+ e sosten cu nan por keda crece y pa nan tin e suficiente capacidad pa duna e servicio cu nan ta dunando pa tur grandi na Aruba.
Club Kibrahacha no ta e unico organisacion pero pa Minister esaki ta un di e organisacionnan cerca di su curason. Un di participantenan a vocifera den un forma di poesia unda cu ta duel e, e gevoel di e grandinan di ta den abandono, cu hopi falta di atencion. E falta di atencion no ta di Gobierno, pero e falta di atencion di nan propio famia. Esey no ta conta pa tur famia pero tin hopi hende grandi cu tin e soledad ey.
“Segun mi no tin un ley, niun maneho cu nos por bin cun’e pa drecha esey. Mi ta kere cu esey ta simplemente nos mes como ciudadano, nos mes como humano mester bay busca den nos curason ta dicon nos no ta dun’e atencion”, Minister Schwengle a expresa. Ta compronde cu e sociedad a cambia y famianan a bira mas chikito, unda cu mama y tata mester traha, menos yiu y menos tempo pe grandinan.
Minister Schwengle a duna un ehempel cu e mes ta 100% un Minister di pais, e ta traha tambe acerca como specialista di pulmon y e mes tin tempo pa tuma contacto cu su mayornan tur dia. “Mi no por imagina mi cu tempo ta e motibo. Mi ta kere y mi palabra na pueblo ta pa ban duna nos grandinan e tempo y atencion cu nan merece”, Minister Schwengle a remarca. Por ta un hende por ta druk, por ta tempo ta schaars, pero den e tiki tempo ey hende por traha un tiki tempo di 10 of 15 minuut pa yama e mayornan y puntra nan con a bay cu e dia. Duna e grandinan un tiki di atencion y esey ta loke cu nan kier.
Pa hopi aña Club Kibrahacha ta haciendo diferente actividad social pe hendenan grandi y e ta hopi importante pasobra asina nan por keda den contacto cu otro persona, pa tin amistad y pa ta activo den comunidad, director di Club Kibrahacha 60+ Jeffrey Matos a remarca. Hopi hende ora cu nan baha cu pensioen, e contacto ta bira menos y si no sigui mantene e contacto social ta ripara cu nan ta cay den soledad y e problemanan di salud ta cuminsa.
Esey ta importante pa Kibrahacha y den e ultimo 32 aña unda cu nan ta un centro di actividad unda hendenan ta topa otro pa haci actividad hunto. Club Kibrahacha ta organisando e actividad di dia di mama pa hopi aña y e ta un donacion di ICON Hand cu a regala Kibrahacha y pa añanan nan ta bay na Manchebo pa celebra cu e grandinan e dia di mama. “Nos tur lo bira grandi pero nos no kier ta bieu y e unico manera pa nos logra esey ta keda activamente den nos comunidad. Participa y keda cu contactonan social. Bishita centronan di actividad y tin hopi na Aruba. Esey ta e unico manera cu bo ta biba largo y saludabel”, Jeffrey Matos a remarca.