Diamars mainta a tuma luga e segundo parti di e apertura oficial di e conferencia Aruba Meets Europe (AME) 2018, esaki na Hyatt Regency Resort. Minister presidente di Aruba, Su Excelencia Evelyn Wever-Croes a hiba palabra di bonbini na esunnan presente. Presente tabata tambe, despues di a efectua e prome parti di apertura dialuna anochi, minister di Turismo – Salubridad Publico y Deporte, Su Excelencia, Danguillaume Oduber. Presidente di Comite di Turismo di Parlamento, Sra. Setty Christiaans-Yarzagaray y otro miembronan di parlamento tambe a asisti na e apertura, conhuntamente cu participantenan y invitadonan kende a presencia presentacionnan interesante di e oradornan, entre otro CEO di A.T.A. Ronella Tjin Asjoe-Croes – CMO di AHATA Jim Hepple – CEO di AAA James Fazio – CMO di A.T.A. Sanju Luidens-Daryanani y Area Director di A.T.A. pa europa Tirso Tromp.
Tawatin interes grandi di e participantenan internacional como tambe esunnan local pa loke e mercado Europeo ta trece y loke ta e plannan pa futuro.
Minister Presidente di Aruba a subraya e importancia cu turismo tin pa Aruba, indicando cu esaki ta representa 86.5% di contribucion na Aruba su GDP y 87% di contribucion na empleo total di Aruba. tambe a gradici tur socio pa nan compromiso pa cu Aruba, su turismo y su comunidad.
Ronella Tjin Asjoe-Croes a ilustra e importancia di Europa pa Aruba den cifra. a indica entre otro cu Europa ta un mercado stabiel pa Aruba representando a base consistente 8% di Aruba su total di bishitante ‘stay-over’. a comparti cu esaki a subi cu 5% na 2017 y cu pa prome’ kwartaal di 2018 e mercado Europeo a subi cu 6%. a sigui bisa cu locual ta haci bishita di e Europeo interesante, pues di e mas di 90 mil bishitante, ta e hecho cu e averahe di estadia ta uno mas largo (11 anochi) cu ta permiti e bishitantenan pa laga mas atras den nos economia.
A subraya pa medio di presentacionnan con imperativo ta pa semper tuma e dinamismo di turismo na cuenta. na A.T.A. trendnan global di e biahero/biahe ta wordo monitorea continuamente pa cu su impacto riba e industria di turismo.
Hecho ta cu turismo ta sigui briya como un di e streanan mas fuerte den un mundo mundial insigur. pa tal motibo, hunto nos mester ta prepara y tuma accion pa salvaguardia e desaroyo sostenibel di e industria aki.
Manera ya ta conoci caba, oficina di turismo su compromiso ta pa fomenta un desaroyo turistico sostenibel cu ta na beneficio di e comunidad di Aruba, su bishitantenan y socionan di turismo.
Sr. Hepple a comparti desaroyonan clave den e sector hotelero y otronan, cu esunnan presente. mientras cu Sr. Fazio a pasa den e proyecto di aeropuerto, esta ‘Beatrix 2030’.
Sanju Luidens-Daryanani hunto cu Tirso Tromp a elabora riba un campaña nobo pa Aruba cu lo lansa den e di tres kwartaal di e aña aki. e campaña ta pone e hende di Aruba central y ta conta locual Aruba ta significa y ofrece pa medio di e personahenan aki den nos comunidad.
Riba e potretnan por mira e oradornan como tambe invitado y participantenan durante e apertura oficial di AME 2018.