Den rueda di prensa di POR Plataforma e Forza Nobo, mr. Andin Bikker a bolbe papia tocante e tema di siguridad y e responsabilidad cu prome minister tin den esaki, pero cu e no ta asumi. Bikker a bisa cu prome minister sr. Mike Eman no ta apto pa goberna nos pais. Forsa Nobo ta tumando nota desde Juli 2014 caba cu sr. Eman a bay den welga di hamber, cu e ta ausente constantemente. Aworaki nos ta tumando nota, por ehemplo, cu den menos cu tres dia tabata tin atraco un na Diemanstraat, un na Catiri y Dialuna hasta a bay over cu a afecta nos turismo. Nos a tuma nota cu banda di Super Food tabata tin atraco.
Nos a tuma nota cu prome minister, cu tambe ta responsabel pa orden publico, y pa e bienestar general di nos pais, caminda un di su facetanan ta siguridad e minister ta ausente constantemente, Y no ta bin dilanti asumi e responsabilidad y bisa cu e ta bay un reunion urgente den parlamento, conhuntamente cu minister di husticia pa wak con hunto por garantisa e siguridad pa nos conciudadanonan”, Andin Bikker a splica. Bikker ta wak cu preocupacion y ta haya hopi serio ta cu pa loke ta trata nos turismo, Minister Presidente gewoon ta bay sigui cu un campaña di hunga bunita, biaha, pega luz den bario pero no ta asumi su responsabilidad. Tambe a tuma nota cu den cura di misa y luganan cu por spera cu adictonan ambulante lo a respeta esey no ta e caso y ora acudi na gobierno ta bin cu excuus cu nan no ta responsabel pa cierto areanan. Bikker a menciona un reunion cu IMF cu Parlamento pa loke ta trata e situacion financiero di nos pais, y a bisa pa djis tuma nota cu tin rapportnan caminda ta premira cu nos ta bay paga na 2019 e suma di 230 miyon florin djis na interes di servicio di debe, cu no ta drenta nos economia.
Esaki nan ta consecuencia di endeudamento di e mal vision di Sr. Eman, pa loke ta su maneho cu ta ausente constantemente y no ta asumi su responsabilidad pero e ta keda gasta placa. Ta cosnan hopi preocupante y na final di dia e gobernacion aki ta bay wordo husga dia 22 di September venidero. Mi ta kere cu pueblo mester realisa si, cu ora bo ta eligi un gobernante e persona ey mester t’ey no pa cana den bario haci bunita, ni sinta pega luz pasobra p’esey nos tin ELMAR. E t’ey pa garantisa cu bo tin siguridad den bo cas, riba caya, den areanan turistico y completamente rond di nos Isla. P’esey e gobernante t’ey” ta palabranan di Andin Bikker.
Bikker a sigui bisa cu hopi biaha nan ta haci encuestanan pa wak kico ta e preocupacionnan mas grandi den pueblo, y un di esunnan di mas grandi ta siguridad, y na final di dia bo por tin diferente cos den bo bida, pero si bo no tin siguridad, salud, y e cosnan basico pa loke ta trata e bienestar general como persona, claro cu bo no por ta feliz y mi ta kere cu na final di dia mester realisa cu 22 di September venidero, ora bo bay den urna electoral bo mester evalua un rato kico precis bo ta votando” segun Andin Bikker. El a argumenta tambe cu for di 2014 Prome Minister si a bin cinco pa seis biaha en total na Parlamento, e lo ta hopi, pero cualkier universidad cu invit’e pa duna un charla afo, e ta bay y aworaki cu ta na Aruba mas visiblemente e ta ausente. El a splica cu esaki ta hopi preocupante pasobra e minister aki ta responsabel pa tur faceta di nos pais, entre otro siguridad, pero e no ta yama atencion di Minister di Husticia, y tur e pantaya cu e cu su makinaria di prensa ta purba bende na pueblo ta un show pero e no ta haciendo su trabao segun nos constitucion.