DEN HAAG – Den cuadro di e vision di Gobierno pa bai stimula e economia na Aruba, Minister Plenipotenciario Guillfred Besaril a atende e conferencia Smart City na Den Haag. Hunto cu minister tabata presente na e conferencia funcionarionan di di Cas di Aruba Roy Hart y Jacky Roga.
Secretario di Estado pa Asuntonan den Reino Raymond Knops a hasi por medio di video e opening di e conferencia. Sr. Knops a papia di e importancia di innovacion pa loke ta digitalisacion di e aparato gubernamental. Despues a hiba palabra e burgemeester suplente di Den Haag Saskia Bruines cu a splica cu sociedad ta transformado den tecnologia cu e rol di ser humano ta cambiando y un Smart City por ta exitoso ora e ciudadano ta parti di e transformacion.
Despues Michel van Eeten Profesor Governance of Cybersecurity na Delft a duna un presentacion tocante atakenan cu ta tuma lugar den e aparato di gobierno, hotel, y tur otro institutonannan y cu constantemente mester ta alerta pa proteha e systema.
Durante e conferencia minister Besaril tabata tin oportunidad pa papia tambe cu burgermeester suplente Bruines caminda a papia riba cooperacion entre Aruba y Den Haag. Tambe a papia cu Arthur van der Wees, Co-Founder & Co-Chair di Institute for Future of Living. Sr. van der Wees a informa minister cu nan ta participa cu diferente mision di trabao rond mundo pa juda compania y pais cu e strategia di Smart City Strategy. Pa hasi esaki nan ta usa “Sustainable Development Goals”. Institute for Future of Living ta enfoca riba tur pais den Reino y nan tin contacto cu diferente compania.
Minister a keda hopi satisfecho cu Aruba tabata bon representa na e conferencia aki y cu bon contacto a wordu hasi pa futuro cooperacion.
Potretnan ta cortesia di Cas di Aruba