Sint Eustatius: Minister Plasterk di Asuntunan Interno i Relashonnan den Reino no a aproba e presupuesto di 2017 pa Sint Eustatius. E presupuesto di Entidat Públiko no ta kumpli ku e eksigensianan ku lei ta preskribí. Awor Kolegio Ehekutivo di Sint Eustatius mester presentá mas pronto posibel un presupuesto nobo. Esaki Minister Plasterk a informá Kolegio Ehekutivo i Konseho Insular di Sint Eustatius.
Segun e lei FINBES (Wet financiën openbare lichamen BES) e minister di Asuntunan Interno i Relashonnan den Reino mester duna aprobashon na un presupuesto aprobá pa Konseho Insular.
E presupuesto di 2017 di Sint Eustatius no ta kumpli ku e eksigensianan stipulá den lei pasobra e presupuesto di personal ta muchu tiki pa paga tur e personal, no a tene kuenta ku e gastunan imprevisto, i no a reservá sèn pa e gastunan pa ehekushon di e plan di akshon pa pone e problemanan atministrativo na òrdu i bou di kontrol.
Awor ta keda na Kolegio Ehekutivo pa a korto plaso entregá un presupuesto nobo ku sí ta kumpli ku lei. E kolegio finansiero di supervishon BES atrobe lo duna konseho i despues, tumando e konsehonan aki na konsiderashon, e presupuesto nobo lo keda presentá na Konseho Insular pa aprobashon.
Tanten ku no tin aprobashon di e presupuesto di 2017, tur pago i obligashon ku Entidat Públiko di Statia tin entrante promé di yanüari 2017, mester keda presentá na Minister di Asuntunan Interno i Relashonnan den Reino.