Diahuebs ultimo, den reunion publico di parlamento a atende cu un amienda importante encuanto “geregistreerd partnerschap”. E amienda aki ta uno cu ta pone enfasis riba derecho igual di tur ciudadano. Minister Paul Croes a duna di conoce cu den su opinion, si para keto un rato riba e palabranan derecho igual, nos mester tene na cuanta cu nos ta biba den un estado di derecho. Tur ciudadano merece y mester wordo trata igual, pero mientras semper naturalmente cu bo ta cumpli cu ley. Minister Croes ta kere cu e discusion aki ta trata algo mas profundo cu ta e derecho igual di stima un persona y tambe e derecho igual di ta feliz riba bo propio pais. Sinembargo, den comunidad varios persona cu bon reputacion y respeta den nos comunidad a tuma un posicion contra di e amienda aki, como cu realmente y honestamente nan ta kere cu matrimonio ta manera bijbel a prescribi entre un hende homber y un hende muher. Den caso di Minister Croes, matrimonio tabata su escogencia pa felicidad tambe pero esey no ta significa cu esey ta loke ta felicidad pa tur hende. Minister Croes ta kere cu buskeda na felicidad individual mester keda na cada un di nos. Si un ruman, primo, amigo of amiga ta sinti su mes feliz di scoge e pareha cu e ta desea, como un ser humano nos mester por respeta desicion den esaki. Minister Croes a finalisa bisando cu aunke den e caso aki, su persona no mester a vota pro of contra di e amienda presenta den e reunion aki, mester wak profundo den bo curason y sondea si di berdad e ta causabo daño pa duna un prohimo e opcion pa su felicidad.