Minister Paul Croes ta sumamente content cu un proyecto hopi anticipa pa FAVI a logra bira un realidad danki na Feria Social y CEDE Aruba. Feria Social conhuntamente cu CEDE Aruba e aña aki a yuda recauda fondo pa 15 fundacion. Cu e fondonan aki cada fundacion por a realisa un proyecto desea hunto cu ayudo di hobennan boluntario den nos comunidad. Un di e fundacionnan aki ta FAVI cu e aña aki a traha riba E proyecto yama “Dare the Darkness” .
Dare the Darkness ta un evento unico na unda cu personanan ta keda invita pa participa na un cena den complete oscuridad. E meta di e cena aki ta pa un y tur por haya un impresion y e experiencia di kico realmente ta nifica di ta visualmente incapacita y asina concientisa nos comunidad riba e tema. Banda di esaki e fundacion kier logra recauda mas fondo pa asina den futuro, e fundacion por cubri su propio gastonan operacional pa por sigui brinda servicio na su clientenan. E Dinner in the Dark lo tuma lugar dianan 25, 26 y 27 di Augustus y despues di un evaluacion breve ta spera di por habri esaki pa publico tambe.
Minister Paul Croes ta sumamente contento cu e iniciativa aki como cu esaki ta prome biaha na Aruba cu nos comunidad lo sera conoci cu un evento di e forma aki. Minister Croes ta felicita FAVI, CEDE Aruba, Feria Social y tur hoben cu a aporta na e proyecto aki.