Di un manera responsabel y diligente Minister di Asunto Social, Labor y Hubentud, drs. Paul Croes a presenta dilanti di e 21 miembronan di Parlamento pa argumenta su presupuesto, pero tambe contesta e preguntanan cu tabatin; riba 100 en total. Pero mas leu di e cumplimento cu nos leynan di contabilidady finanzas publico, e presupuesto di e tres Ministerionan aki a ilustra un maneho cu ta integral, actual y hustifica.
Mas leu di djis mantene e operacion di departamento, Minister Paul Croes a sa di permiti espacio pa mehoracion den e funcion di nos instancianan publico, ademas di ehecuta programanan adicional cu ta fomenta e bienestar social di esnan mas vulnerabel manera hoben, personanan cu limitacion of buscando trabou.
Pa loke ta trata e maneho social, e cartera aki ta consisti di varios punto cardinal manera ta e Maneho Integral di Hubentud bou di cual a resort promocion y defensa di derechonan di mucha, campaña #stopawo, meldcode y programanan manera Feria Social, Poder di Hubentud y proximamente META. Siguientemente ta e personanan cu limitacion caminda ta brinda un apoyo adicional na e diferente fundacionnan riba nos isla, Feria Social ta recauda y aporta cu 15 mil Florin y promocion di integracion den mercado laboral.
Den maneho social tambe ta inclui sosten familiar cu, entre otro, nombracion di director nobo di Fundacion Pa Nos Muchanan y personal, ademas di un contacto mas estrecho y productivo cu otro organisacionnan.
Primordial ta un situacion laboral saludabel caminda e sector aki ta conociendo un indice di desempleo cada bes mas abou. Esaki ta posibel danki na e trabou conhunto di henter Gabinete Eman, pero sigur tambe na e refuerso cu Departamento Pa Progreso Laboral a conoce, como tambe e programanan ‘Hoben Balente’ y ‘Expo Labor’ cu a yena mas di 500 cupo di trabou den un solo evento. Adicionamente tin e Banco di Vacatura Online, programa ‘Ban Traha’, CITGO Desk y den futuro e Refinery Certification Program.
Presupuesto 2017 tambe ta refleha un enfoke riba seguridad y salud na pia di trabou continuando cu e trayecto pa ARBO, loke na su luga ta trece cune un aumento den productividad y un desaroyo economico positivo. Relaciona cu esaki tambe por menciona un refuerso di Departamento di Inspeccion di Labor pa medio di nombracion di un director y inspectornan nobo, como tambe control y aplicacion di ley. Optimalisacion di e proceso di mediacion tambe ta bay contribui na un miho ambiente di trabou.
Atrabes di henter e documento cu ta delinea e gasto y inversionnan di Ministereionan di Asunto Social, Hubentud y Labor, tambe ta atende cu e cambionan den Codigo Civil cu ta sumamente importante y ta cubri tur tres area. Tin beneficio pa personanan cu limitacion, pa hobennan pa medio di derechonan y tambe pa e trahadornan, manera aumento den dianan di vakantie y responsabilidad tanto pa e dunador di trabou, como pa e trahado.