Den transcurso di diahuebs merdia y atardi, Minister di Asuntonan Social, Labor y Hubentud drs Paul Croes a ricibi na su oficina e bishita di su homologo di Corsou, Minister Ruthmilda Larmonia Cicilia. E encuentro ta un continuacion di e contactonan cu ambos mandatario a sostene algun luna pasa na nos isla ruman.
E encuentro tin como obhetivo pa estrecha e lasonan di cooperacion aplicando programa y linea di maneho exitoso den ambos comunidad. Minister Paul Croes a califica e reunion manera uno hopi probechoso, mientras cu Minister Cicilia, di su parti, a comenta cu Minister Croes semper ta un persona habri y su maneho ta enfoca riba e ser humano, cual ta algo cu nan ta comparti.
E reunion a tuma luga na oficina di Minister Croes na Cocolishi, caminda ambos titular di Asunto Social y Labor tabata compaña pa e director di e departamentonan respectivo. Di e manera aki a cubri un gama amplio di topico, di cual algun a resulta den decisionnan concreto cu ta bay ehecuta. Temanan manera integracion den mercado laboral a bin riba mesa.