Minister di Asuntonan Social, Hubentud y Labor, drs. Paul Croes tabata diahuebs mainta den Semeleerstraat hunto cu Minister President Mike Eman y colega di infrastructura, Benny Sevinger pa inspecciona e trabounan di embeyecemento di bario cu ta tumando luga. E atencion y contacto personal ta di suma importancia na opinion di Minister Croes ya cu asina bo ta midi con bo ta haciendo bo trabou como gobernante y unda mas tin espacio pa mehoracion.
“Un bunita acogida di e pueblo di Noord, naturalmente hendenan hopi amabel y cariñoso. Hendenan ta habri nan porta pa ricibi Ministernan den nan cas,” asina Minister Croes ta bisa. E ta remarca cu ta poco pais na mundo bo ta haya cu e propio Prome Minister ta bishita cas pa cas pa wak e trabounan cu e mes a duna instruccion pa haci. “E acercamento, atencion y comunicacion cu pueblo ta keda esencial; no ta pasobra bo a haya un puesto den Gobierno bo mester distancia bo mes di e comunidad,” e titular di Asuntonan Social a declara.
Pa Minister Croes, pueblo di Noord ta esun cu el a lanta cune. E ta contento di mira cu e apoyo ta grandi ainda y ta kere esey ta door di e trabou cu ta haciendo. “Ora bo genera asina hopi progreso pa bo pais, ta pa tur e ciudadanonan, no pa bo. Y esnan cu ta kere cu infrastructura no ta un inversion util, mag di bin puntra e hendenan den nan cas si e ta util of no. Ta hendenan cu pa hopi aña tabatin santo dilanti nan cas y tabatin scuridad den bario. E tipo di inversionnan aki ta haci e calidad di bida di e ciudadanonan y nos ta sinti cu nan ta gradicido.”
E bishita den bario tambe ta contribui na e aspecto social. Den diferente cas ta haya situacion sea di bijstand of otro apoyo social y funcionario di BoBario ta tuma informacion cu ta pasa despues pa departamento di asuntonan social. Minister Croes a comenta durante e accionnan cu Gabinete Mike Eman ta realisa den bario regularmente tin biaha tin situacion cu por atende inmediatamente y ta haci asina tambe den coordinacion du Ministerio di Asuntonan Social.