Na salida for di Sala di Parlamento, Minister di Asuntonan Social, Hubentud y Labor, drs. Paul Croes a expresa su satisfaccion pa un reunion cu a cana den bon ambiente y caminda a cumpli cu su deber como mandatario. Durante tratamento di presupuesto pa su Ministerio, Minister Croes a sa di contesta debidadmente mas di 100 pregunta haci dor di miembronan di tur fraccion den Parlamento di Aruba.
Preguntanan a varia for di temanan laboral manera CITGO y Aura Casino entre otro, pasando riba e tereno social cu ta cubri e parti mas grandi di e presupuesto, y naturalmente tambe e proyectonan cu Minister Croes ta ehecuta regularmente na beneficio di nos hubentud manera Feria Social y Poder di Hubentud, entre otro.
Riba e aspecto social Minister a sa di contesta preguntanan riba e maneho contra abuso di mucha, di personanan cu un situacion financiero vulnerabel y di e maneho riba personanan cu limitacion. Solamente na bijstand tin un suma presupuesta di 26 miyon Florin. Ta conoci cu Minister Croes a y ta sigui haci esfuersonan pa reintegra hopi di e beneficiarionan bek den e sector productivo di nos comunidad, reduciendo e cifra aki.
Un total di 18 miyon Florin riba e presupuesto pa 2017 ta destina como subsidio pa fundacionnan cu ta realisa trabou social riba nos isla. Adicionalmente, Minister Paul Croes a aloca un suma di 1.4 miyon extra na e post di Departamento di Asunto Social pa asina por ta miho ekipa pa atende cu casonan manera di abuso di mucha. Pa e mandatario esaki ta un elemento primordial den su maneho ya cu e departamento publico ta haci un trabou sumamente importante.