E mandatario encarga cu e carteranan di turismo y cultura, Otmar Oduber recientemente tabata di bishita na Watertoren San Nicolas unda cu e instalacion di Aruba su Museo di Industria ta tumando luga. E apertura di e museo, riba dia 12 di September proximo ta coincidi cu Aruba Art Fair 2016, y e conferencia internacional Happiness 360, cual ta conta cu presencia di ministernan di cultura y di turismo di diferente pais.Minister Otmar Oduber a bisa, admirando e trabaonan tumando luga pa cu e museo, cu e ta hopi satisfecho y contento cu e desaroyo aki, cu e vision di cuater aña pasa ta tumando forma, y combina cu e entusiasmo y empeño di habitante y comerciantenan di San Nicolas e centro di e ciudad aki den un futuro cercano ta priminti di bira un area vibrante unda cu habitantenan di Aruba y turistanan ta topa pa recrea, relaha y diberti. A planea e museo bon, y di acuerdo cu un vision bunita, unda cu no ta presenta algun mesa cu algun obheto exponi, pero un exposicion cu ta consisti di elementonan innovativo y tecnologia, instala na un forma profesional pa un team consistiendo di persona y companianan local y di Hulanda. E mandatario a bisa cu tin apenas dos siman pa tur cos keda cla y e ta contento pa mira e trabaonan avansando rapido pa asina combina e apertura cu Art Fair y e conferencia Happiness 360. Aruba a gara e antorcha pa cu e vision cu UNESCO y otro organisacionnan a premira di ta posibel pa nos isla, y pronto por mira e elementonan un pa un comberti den un realidad.
Minister Oduber a felicita e directiva y tur empleado di Fundacion Museo Aruba (FMA) pa e logra grandi, cual ta ricibi sosten di Aruba Tourism Authority, Tourist Product Enhancement Fund, Aruba Ports Authority y otro partnernan cu a haci tur loke ta posibel pa e vision wordo planifica, e arkitectura wordo prepara y pa e vision bira un realidad.