Ta importante pa comunidad ta na altura di e procesonan cu ta andando y e pasonan cu Ministerio di Infrastructura y Medio Ambiente ta tumando pa locual ta realisacion di e Parke Marino. Durante ultimo añanan Departamento di Naturalesa y Medio Ambiente (DNM), (TNO) y otro partnernan a traha duro riba esaki y cu e empuhe cu a ricibi durante di e ultimo lunanan, awe nos por ta contento pa bisa cu actualmente e ley aki ta na Raad van Advies.
‘E topico di Parke Marino tabata wordo trata prome cu Parke Nacional Arikok a wordo institui. E ta un discusion di mas di 30 aña andando y cual como minister anterior di turismo mi tabatin e honor na 2010/2011 pa a contribui na e desaroyo di e ley cu ta acapara e Parke Marino.’
Banda di e noticia importante di anuncio di e Parke Marino, lo inicia un ronda di consulta cu tur esnan cu ta usuario (tur cu ta haci uzo di e area, piscado, buceado, deportista, operadornan di deporte acuatico entre otro ) pa percura pa e contenido di e ley wordo poni hunto, pa por ta riba mesun liña cu e contentido di locual lo bira e Parke Marino, Minister Oduber a splica.
A scoge 3 area specifico pa incorpora den e Parke Marino den e prome fase di introduccion di e parke. E 3 areanan aki ya for di den añanan 90 a wordo identifica como e areanan cu biodiversidad di mas halto. A mustra tambe den e combersacionnan cu tabatin cu e bestuur anterior di Parke Nacional Arikok como tambe e bestuur interino cu ta sinta na e momentonan aki, cu Gobierno lo kier ‘parkeer’ e Parke Marino hunto cu e areanan cu ta bay wordo protegi pa ley / 16 + areanan, den e regimen di Parke Nacional Arikok unabes cu esaki ta conta cu un structura ‘two tier’. Cu e structura mensiona lo tin un ‘raad van toezicht’, contrario na antes cu tabatin un ‘uitvoerend bestuur’. Un ‘raad van toezicht’ por controla (den nomber di Gobierno) e cantidad di areanan den e parke, como tambe fondonan cu Gobierno ta pone disponibel (casi 3 miyon florin anualmente) na e stichting.