E prome artista pa yega Aruba pa prepara pa su participacion na Aruba Art Fair 2016, ta e artista Portugues Bordalo II (Bordalo Segundo), kende a wordo ricibi cu un caluroso bonbini pa Minister di Turismo y Cultura, Otmar Oduber.Loke tabata un deseo, un idea y vision di Tito Bolivar y Diana Croes, esta Aruba Art Fair, a haya e sosten completo di Ministerio di Cultura y Aruba Tourism Authority pa bira un realidad. Mas di 30 diferente artista internacional a acepta e invitacion di Aruba, y mas di 100 local lo ta participando na e evento y actividadnan, combertiendo algun edificio y e cayanan di centro di San Nicolas den un feria di arte coherente y grandioso.Minister Otmar Oduber ta hopi contento cu e desaroyonan tumando luga rond di e evento aki, como tambe con a logra combina Aruba Art Fair cu e apertura di Museo di Industria – ubica den Watertoren di San Nicolas, y e estadia di mas di 40 dignatario internacional specificamente for di e ramonan di cultura y turismo pa e conferencia Happiness 360.
Poco poco ta wak e vision pa presenta San Nicolas como Aruba su ciudad di cultura y herencia birando un realidad. E idea cu e cuminsa cuater aña pasa, ora cu a biaha pa New Orleans cu un grupo di comerciante y a convence nan pa participa y inverti den San Nicolas a pone e bala lora pa loke ta e desaroyo, preservacion y transformacion di San Nicolas tumando luga awendia. Bordalo II, kende a nace na Lisboa, Portugal na aña 1987, ta un “street artist”. Su welo, Real Bordalo tabata un pintor conoci na Lisboa y a inspira su nieto pa dedica su mes na arte. Actualmente Bordalo II ta un artista conoci pa su trabaonan 3D cu ta exhibi na Lisboa y otro cuidadnan. E artista urbano unico aki ta uza desperdicio como su medio, y reciclahe ta su pasion. E ta comberti sushi den esculpturanan impactante. Su serie fantastico “Big Trash Animal” ta consisti di muralnan 3-D di diferente animal.Minister Oduber a agrega cu ya un parti grandi di e caya principal di San Nicolas a keda cla, y e luznan a wordo cambia caba. Tin hopi iluminacion, y lo tin efectonan di sonido, diferente edificio lo conoce un “take over”, unda cu e artista ta transforma e edificio of uza e edificio como su inspiracion.E mandatario tabata hopi contento tambe pa por anuncia cu e di dos tienda di Cosecha, cu ta wordo maneha pa Fundacion CRAFT tambe a habri caba.
Cu e meta principal pa crea desaroyo economico di San Nicolas, a mira e balor agrega pa comberti y promove San Nicolas den un plataforma diferente pa arte y cultura. Minister Oduber a splica cu un decision tuma na Aruba tres aña pasa, esta di combina e carteranan di cultura y turismo, a wordo treci dilanti apenas aña pasa como conseho pa paisnan rond mundo di parti di World Tourism Organization y UNESCO. E decision pa combina e dos ministerionan atrobe ta un area unda cu Aruba ta un frontrunner, segun Oduber, y ta un decision resultando for di e raport “Winning the future” y estudionan haci pa Aruba Tourism Authority cu ta mustra ki direccion mester bay.