minotmonument
Minister Otmar Oduber despues di un aña di conversacion cu Minister di Cultura Michelle Hooyboer –Winklaar y Minister di Finanzas Mike de Meza a logra pa awe conhuntamente cu Fundacion Museo Aruba, anuncia un otro atracccion pa tanto local como turista na San Nicolas.Aña pasa 18 di maart e mandatario a haci un bishita na e Museo di Antiguedad situa na Dakota unda cu por a mira un coleccion sumamente valioso di artefactonan antiguo di Aruba. E espacio na Dakota unda cu famia Odor a expone e coleccion aki tabata den nan propio cas y publico por solamente bishita e museo 2 biaha pa aña.
Minister Oduber ta opina cu un inventario asina mester haya un otro forma di exposicion, unda e lo tin espacio pa mas hende por disfruta di dje, nos comunidad y nos turistanan pa nan mira di unda nos balornan ta sali y con nos a lanta y ta e nacion cu nos ta awe.
E proceso aki a dura mas o menos  un aña y durante henter e trayectoria a busca un forma adecua pa duna San Nicolas e forza pa atrae e turistanan pariba. Esaki a conduci naturalmente na un cantidad di proyectonan, como tambe a cuminsa cu reconstruccion den tur bario unda cambionan grandi ta tumando lugar, Minister di Turismo a splica. Incluso a ubica un oficina di tursimo den centro di San Nicolas, pa facilita tur e bishitantenan cu ta pasa conoce San Nicolas cu informacion. Minister Oduber a agrega cu desde apertura di e oficina di Turismo ta druk tur dia.
E herencia di nos historia ta importante pa e comunidad local, como tambe pa e experiencia unico di nos bishitantenan pa conoce mas di nos cultura y di nos antepasado. Minister Oduber pa e motibo aki ta honra loke ta di nos y kier salvaguardia e unico Museo di Antiguedad di Aruba. Pa logra esaki a uni forza cu Fundacion Museo Aruba pa aloca un parti di e coleccion di Sr. Odor den e San Nicolas Community Museum cu lo habri su portanan pa publico 18 di maart.
Minister Otmar Oduber ta sumamente orguyoso di por contribui di e forma aki, pa medio di e fondonan di mehoracion di producto Aruba (TPEF), cu desaroyo di nos cultura, herencia y tradicionnan na San Nicolas.