Si, lector, bo a lesa bon: recientemente nos por a weita y scucha minister Otmar Oduber splica na television e asunto di e turistanan ATM, kendenan den ultimo añanan na gran cantidad tabata bishita Aruba, pa saca dollar for di e machinnan ATM, pa despues cambia esakinan riba mercado negro na Venezuela, pero tambe pa na mesun momento cumpra tur sorto di productonan cu na Venezuela ya no ta disponibel mas.
Otmar a splica con esaki a yega na por lo menos 200.000 Venezolano, y con e cifra aki pues a wordo añadi incorectamente den e cantidad di turista cu anualmente ta bishita Aruba.
Cu esaki e flamante minister di turismo pues a admiti cu nos mester kita 200.000 “turista” Venezolano for di e cantidad di 1.176.776 cu – di acuerdo cu e calculacion pues incorecto – lo a bishita Aruba na 2015; y e berdad ta cu e ora ey nos ta yega na un cifra bao di e 1miyon!
TUR E EXAGERACION DI 1 MIYON TURISTA, TA DJIS UN ENGAÑO Y UN “OP DE MOUW SPELDERIJ”.
E minister aparentemente no a realisa su mes cu, admitiendo e gran cantidad di turista Venezolano aki, el a admiti y a implica indirectamente tambe, cu nada ta “klop” den su gabamento y bromamento riba e mas di 1 miyon turista, cu danki na SU maneho “tremendo” lo ta bishitando Aruba tur aña.
Djis desconta di e cifra ey e cantidad di e turistanan “ATM” – cu pa colmo E mes ta menciona – y e ora ey un mucha di 1ste klas mes lo por mustrabo cu Aruba NUNCA a yega di ricibi 1 miyon turista den un aña!
Pa esun cu no ta kere: 1.176.776 -/- 200.000 = 976.776!
Tur su gran gabamento y bromamento pues tabata producto di mentira y engaño; bo ta weita cu ta E mes a haci e calculacion pa nos?? Claro cu e no a realisa su mes esaki, pero el a cay den e buraco cu e mes a coba!
ESUN CU COBA UN BURACO PA OTRO, TA E MES TA BAY CAY ADEN!
Ta strañabo cu Otmar su carson awor a cay te na su enkel? (he has his pants down). Awor e ta para pa ridiculo, pasobra pa e ultimo dos añanan el a gañanos cu Aruba tur aña ta ricibi mas di 1miyon turista; Otmar a distribui e raportnan oficial di ATA rond di mundo henter, y a duna esaki tambe na CAft y na IMF, gobierno di Hulanda, etc., y awor e ta admiti di a gaña na grandi.
Wel, esey si ta un bunita papel riba nivel internacional. Tanto e como su gobierno a haci nan mes bastante ridiculo.
E COFFEE-BREAK CU JIM HEPPLE
Mi a comprende cu te awor aki Jim Hepple (AHATA) no a bay bebe koffie cu minister Oduber pa huma e pipa di paz despues cu Parlamento a aproba e ley nobo encuanto limitacion di benta di paketanan all-inclusive.
Otro sla pa e minister, pasobra di e lihe ey e paz cu AHATA lo no wordo cera.
Di otro banda ainda no tin noticia di parti di AHATA y e doñonan di hotel encuanto e caso al respeto cu nan lo cuminsa contra e minister y e Gobierno.
Pues, nos lo mester tene un tiki pasenshi mas, bin e ta bin!
“ZANDPLATEN’ DEN LAMA
Na comienzo di e aña aki e minister y ATA cu hopi fanfaria a anuncia cu Gobierno lo bay instala asina yama “zandplaten” den laman dilanti costa, pa asina combati e erosion constante di nos playanan, y cu lo a percura pa e playanan yega na nan grandura normal atrobe. Esaki lo a socede na Maart 2016… nunca mas nos no por a tende nada mas di esaki; pero mientras tanto Holiday Inn si a perde mas di mita di su playanan, y Hotel Tamarijn no tin playa mes mas; y di e manera aki Aruba ta perde su punta di benta mas importante!
ARUBA, ESAKI TA UN AVISO PA BO!!!
Djis algun dia pasa stacionnan di radio y TeleAruba a bini cu e “breaking news” cu un avion(eta) lo a cay den vecindario di De Palm Island.
E biaha aki nos a scapa, pasobra a resulta cu tabata un alarma falso.
Pero Aruba, esaki ta un aviso!
Aeropuerto di Aruba ta wordo maneha door di un familiar amigo di minister Oduber, kende – di acuerdo cu informacionnan ricibi – no tin educacion cu a yega mas leu cu scol primaria (“lagere school”), esta scol basico.
Cu esaki ta completamente contra tur reglanan internacional di aviacion, no tin necesidad pa mas cuestionamento of splicacion.
Tampoco mester ser splica cu Aruba lo wordo colga na e mata di mas halto, den caso cu sosode un accidente di berdad riba pista di nos aeropuerto of den su cercania.
Mi ta tene mi man na mi curason pa locual e ora ey lo bay sosode internacionalmente, y locual lo bay resta di e imagen y e reputacion di Pais Aruba.
Y no lubida cu e riesgo ey nos ta core pa motibo di un deal cu un amigo y famia!
Bo por imaginabo con esaki lo por bay caba? Ta sigur cu “bon” si nunca e lo N0 por caba.
Remigio A. R. Wever, ex-director A.T.A.