Durante dia di awe, diabierna, 2 di September, Raad van Advies a manda un comunicado di prensa, caminda cu nan a comenta riba cierto declaracionnan haci di parti di Minister di Turismo, Otmar Oduber durante tratamento di e concepto di ley pa regula acomodacionnan all inclusive den Parlamento di Aruba dia 24 di Augustus ultimo. E declaracionnan aki ta encera entre otro cu Sr. Rik Timmer lo ta e representante di AHATA den Conseho Consultativo y cu pa e motibo aki e conseho di Raad riba e concepto di ley menciona lo tabata negativo y na interes di e empresa caminda cu Timmer ta traha, pa cual motibo RvA ta considera e declaracionnan aki no solamente ta un insulto pa e miembro concerni, sino tambe pa henter e Conseho mirando cu e ta un insulto riba e capacidad, independencia y imparcialidad di tur miembro.
Den cuadro di esaki, Minister di Turismo, Otmar Oduber, a comenta cu el a lesa e reaccion di Raad van Advies. El a topa cu un miembro di e organo, sra. Van der Waal, kende a bis’e cu lo bay sinta cu e minister pa papia. Pero a opta pa manda un comunicado di prensa, cual e minister ta lamenta den e forma cu el a wordo saca, como si fuera cu el a insulta Raad van Advies.
E minister no sa desde cuando un critica a bira un insulto y e critica no ta funda riba kico su opion ta. E ta funda kico e hecho ta. Den e caso aki tin e hecho cu den AHATA, bao di nan miembrecia ta circula e informacion cu sr. Rik Timmer, den e caso aki, ta un representante di nan den Raad van Advies y por compronde cu esaki ta inaceptabel.
Den Raad van Advies, mester ta obhetivo y traha completamente autonomo di cualkier ruggespraak cu por tuma luga. Loke e minister a trece den Parlamento ta e hecho di un mail cu e tin den su poder. El a kere cu e lo a haya e chens pa comparti esaki cu Miembronan di Raad van Advies, caminda cu no ta opinion di minister Oduber. El a expresa loke ta riba papel caminda cu den un forma hopi cla, bao di e miembronan di AHATA, nan ta bao di opinion cu sr. Rik Timmer, no solamente ta den Raad van Advies pa representa nan, pero e ta forma parti tambe di e board di e reunionnan. Esey ta loke e mail ta bisa di AHATA, caminda cu lo ta discuti riba tipo di puntonan aki manera esun di All Inclusive, cu tabata e momento ey e discusion. Por compronde cu esaki no ta aceptabel. E mester funciona sin conflicto y esey tabata e critica cu e minister a bin cune padilanti.
Si esey ta un insulto, ta prefera di para e ora pa defende interes di comunidad di Aruba, pasobra na final, e minister tambe tabata miembro di Parlamento pa 8 aña largo, caminda cu el a traha cu Raad van Advies. E ley di All Inclusive, a tuma over practicamente tur e recomendacionnan, consehonan cu tabata tin den e conseho di Raad van Advies. Awor e no por critica e hecho cu no ta Otmar a bisa, sino e propio miembronan di AHATA ta bisa cu Rik Timmer ta representa nan den Raad van Advies, e ta haya ta condenabel. E no ta corecto y lo saca un comunicado di prensa textualmente cu e mail cu a circula bao di e miembronan di AHATA, caminda cu a notifica cu sr. Rik Timmer ta den reunion y den circulacion di mail di e board di AHATA, como motibo a duna na e miembronan pasobra e ta representa AHATA den Raad van Advies. No ta e minister tin cu splica esaki. Raad van Advies tin cu splica dicon tin e impresion cu nan tin un miembro no solamente den Raad van Advies, sino cu segun e mail, sr. Rik Timmer ta representa na tambe den SER y ta e dos organonan aki tin cu splica esaki. Sigur un insulto no ta, pasobra e ta un di e ministernan cu semper a representa Raad van Advies masha hopi mes y lo sigui haci’e den futuro.