Gobierno a cumpra e edificio di Uncle Louis Store na San Nicolas basta tempo pasa cu e compromiso pa remodele y hasi un edificio monumental. MEP a sostene e decision aki pasobra e edificio ta un “landmark” pa San Nicolas y nos no kier mira e edificio bai perdi.
Pero pasobra cu Gobierno mester di placa a core bende e edificio na Stichting Monumentenfonds pa Afl. 671.250 prome cu fin di aña 2015. Esaki ta un di e decisionnan di e Gobierno di AVP den desesperacion aña pasa pa tapa e buraco financiero pa 2015. E intencion ta pa Stichting Monumentenfonds remodela e edificio y verhuur e.
Pero awor minister Otmar Oduber a bin Parlamento pa pidi un apoderacion pa gobierno mes huur e edificio bek. Anto no pa un prijs abou, sino pa 25 aña 16 mil florin pa luna. Esaki lo costa nos futuro generacionnan pa 25 aña 4.8 miyon florin! Den e crisis financiero cu nos ta, nos mester ta mas cauteloso y nos no por sigui aumenta e debe asina! Gobierno por a remodele su mes y asina scapa e debe ey riba lomba di nos futuro generacionnan. Of laga Stichting Monumentenfonds verhuur e cu sector priva. Ta pakiko mester sigui aumenta e MEGA DEBE?
Den su defensa minister Otmar Oduber a bisa cu Gobierno kier pa Directie Cultuur (DCA) bai eyden. DCA ta paga awor 9.580 florin pa luna. Kiermen si DCA bay den e edificio, e ta costa 2 miyon florin mas cu e gastonan actual. En bes di baha gastonan di huur, ta aumenta nan!
Pa colmo e departamento di DCA no ta di acuerdo pa bay den e edificio pasobra e edificio no ta adecua ni grandi suficiente pa e departamento.
“Nos ta di opinion cu den e momentonan financiero dificil di nos pais, nos mester ta mas cauteloso. Gobierno mester hasi mas pa baha gasto. E ley aki ta aumenta gastonan pa 25 aña. Sin cu tin mester.
E ley aki no ta tocante San Nicolas, e ta tocante e MEGA DEBE cu Gabinete Mike Eman tin nos pais den dje. San Nicolas lo haya un hoya di edificio, esey no ta cambia den e ley aki. Pero pakico ta nos futuro generacionnan mester bay paga p’e? Loke mi kier bisa ta cu e por a bay tambe na un otro forma, cu lo a costa Aruba menos placa. P’esey nos no por a sostene e ley pa gobierno bay huur e edificio pa 25 aña. Tin otro alternativa” segun lider di MEP Evelyn Wever-Croes.