Minister di Turismo, Transporte y Labor, Otmar Oduber, a reuni diaranson mainta cu ehecutivo di The Ritz Carlton, Mark Ferland, Vice President South-East U.S.A di Caribbean Ritz Carlton Hotel.Durante e reunion aki a trata diferente temanan mara na e exito pa cu e apertura di The Ritz Carlton na Aruba. E mandatario a indica di ta sumamente satisfecho cu e resultado fructifero di e reunion aki pa cu e mercado laboral di Aruba.
Minister di Labor a pone enfasis riba e importancia pa aloca trahadornan local pa ocupa  puestonan cu e hotel 5 estrea aki  lo tin habri pa mercado laboral di Aruba. Di e forma aki ta brindan trahadornan cu na e momentonan aki no ta laborando, e oportunidad pa aplica y traha na e hotel elite aki. Tambe  Ritz Carlton lo yuda pa baha cifranan di desempleo, ya cu una bes e cuminsa opera completamente lo tin 550 hende local cu lo forma parti di e cultura Ritz Carlton.
E mandatario a conversa tambe riba e posibilidadnan pa conhuntamente cu team di The Ritz Carlton duna presentacion na scolnan universitario ( College /University Degree) manera entre otro na Hulanda y Merca, habriendo  portanan pa tuma den servicio recien graduadonan na e paisnan aki, brindando nos yiunan di tera e oportunidad  pa nan bin traha y biba bek na Aruba. E iniciativa aki ta sali for di e punto di bista cu lo mester hendenan cu experiencia riba un nivel halto pa  por brinda e clase di servicio cu ta pas cu e cultura di The Ritz Carlton mundialmente.
Un otro tema cu a bin dilanti ta e idea cu Minister Oduber a trece dilanti pa por tuma den servicio hobennan recien gradua for di EPI y EPB, mirando cu e hobennan aki lo ta en busca di empleo den e sector hotelero. Actualidad ta demostra cu esaki no ta facil pa haya pa hopi di e hobennan. Ministerio di Turismo, Transporte y Labor, Ritz Carlton conhuntamente cu Enseñansa pa Empleo y Departamento di Progreso Laboral lo traha hunto pa por ofrece un curso di servicio extenso pa asina nan por aplica pa por traha na e nivel di servicio cu Ritz Carlton ta boga pe.
Ta hopi importante pa Aruba por brinda e servicio na un nivel halto mirando cu e clase di turista cu Ritz Carlton lo trece lo sa di percura pa  hiba Aruba su nomber den halto.