Nos a yega na mita di e luna y nos por wak bek riba e ultimo 2 siman cu hopi satisfaccion pa con e luna ta progresando.
Aña pasa ora nos a organisa Luna di Enseñansa pa prome biaha e tabata tin varios meta, entre otro, pa duna educadornan e atencion cu nan merece, pa brinda mas informacion y profesionalisacion cerca maestronan, inspira y motiva studiantenan riba diferente tema di Enseñansa, envolvi mayornan mas den enseñansa di nan yiu, y por ultimo, eleva e conscientisacion den nos comunidad di e importancia di enseñansa y kico e ta nifica pa nos pais.
Hopi biaha nos ta pone atencion riba e parti infrastructural di nos enseñansa, cu obviamente ta hunga un rol importante den e ambiente na scol. E ta keda un aspecto cu mester atende cune specialmente pasobra nos tin edificionan cu ta 40, 50 y hasta 60 aña bieu. Esaki ta pakico nos a inverti mas cu Afl 25 miyon florin den renobacinonan di varios scol durante e ultimo 3 aña.
Pero manera nos tur sa, un edificio di scol por ta luhoso y moderno cu tur e “bells and whistles”, pero si no tin cabesantenan y maestronan dedica y motiva, si no tin programanan di calidad y un team di cuido (zorgteam) dunando nan sosten, y no tin un sistema cu ta reconoce e talento di tur mucha y cu ta saca lo maximo for di cada studiante, nos no lo ta trahando optimal den nos enseñansa.
Luna di Enseñansa ta dedica na presenta y comunica tur loke nos ta haciendo pa mehora, eleva y optimalisa nos sistema di enseñansa pa yuda tur studiante yega nan na metanan di educacion.
Actividadnan y programanan manera e workshopnan di Kerndoelen, STEAM camp, Carousel di Enseñansa, World Class Scholar, training di Dr. Allison Cross, conferencia Education Reboot pa docentenan y Beroepsonderwijs training, ta djis algun di e iniciativanan cu ta yuda nos profundisa riba diferente aspecto di nos enseñansa pa yuda cada studiante ta exitoso.