Minister kier aleha politica pero kier nombra directiva di fundacion

0

Un preocupacion grandi ta existi cerca maestronan di scol despues di publicacion di un articulo cu declaracion di Minister di Enseñansa, Rudy Lampe, relaciona cu un stichting cu e lo kier funda pa dirigi DPS, pa asina aleha enseñansa mas leu posibel di e mundo politico.
Parlamentario Marlon Sneek di fraccion di AVP a tuma nota di algun publicacion cu a sali den medionan di comunicacion caminda a sigui reaccion di Minister di Enseñansa riba esakinan, cual reaccion a causa hopi reaccion di hopi maestro riba e plan cu e mandatario tin pa cu e punto aki.
Sr Sneek a sigui mustra cu el a ricibi diferente yamada di preocupacion di maestronan di scol riba situacion aki ya cu mientras di un banda Minister di Enseñansa ta papia di pone den e caso aki e enseñansa riba un distancia pa saca politica for di dje, pero den mesun rosea ta su persona lo ta esun kende ta bay nombra e diferente miembronan cu lo mester bay bira directiva di e stichting aki, cual sigur ta haci e situacion ainda mas preocupante pa maestronan.
Mirando e cantidad di reaccion cu a ricibi, Parlamentario Marlon Sneek hunto cu fraccion di AVP lo bay haci un serie di pregunta na Minister di Enseñansa con e proceso aki ta hinca den otro pa di e forma aki por informa comunidad y sigur esunnan cu ta traha den e sector di Openbare Scholen.
Por a scucha tambe cu lo bay pone e grupo aki riba su mes pero DPS ya caba ta riba su mes ya cu e tin un director cu ta atende cu DPS, y no manera antes cu e tabata simplemente un parti integral di Direktie Onderwijs, pero awor e tin un pia riba su mes, e tin su director y tur su proceso cu ta canando caba.
Fraccion di AVP lo manda un serie di pregunta na Minister pa asina por informa tur cu ta sumamente preocupa caminda por mustra cu e trahado nan actual ta ‘ambtenaar’ y ora cu esaki bira un Stichting, e lo bay bira un asina yama ‘gelijkgesteld’.
Esaki ta pone cu den e caso aki lo kita e posibilidad si den futuro un di e personanan aki cu ta traha pa D.P.S lo kier un traslado pa un otro departamento di Gobierno, nan lo perde e derecho aki ya cu nan no ta ambtenaar mas.
Esey ta un di e preguntanan clave cu fraccion di AVP a ricibi riba e asunto aki y lo kier haya claridad di e situacion aki pa asina tur envolvi den DPS ta na altura kico ta spera nan den futuro si dado caso Minister sigui cu su intencion di crea un stichting pa maneha DPS.

Comments

comments