Minister Plenipotenciario Juan David Yrausquin a haci un bishita di trabao hunto cu funcionario di Arubahuis Roy Hart na Wageningen University and Research (WUR). Nan a wordo ricibi pa gerente cu ta encarga cu e mercado di America-Latino Ria Hulsman, tambe pa Dolfi Debrot, Gerente di Research Marina, Ana Lopez Contreras, Scienstist y Rene Henkens Ecologist.
Sra. Hulsman a duna un splikacion di WUR. E scol tin un total di10.000 studiante y 6000 personal. Pa aña tin 4200 studiante ta hasi nan bachelor, 4200 studiante ta studia pa nan master y 1900 studiante ta studiando pa nan Phd. Riba e tereno di e scol tin diferente compleho caminda e studiantenan ta biba. E studiantenan ta bin for di 100 pais rond mundo. Sigun Sra. Hulsman WUR ta den e miho tres di universidadnan di mundo pa locual ta trata agricultura.WUR tin un oficina na China y esey ta e unico establecimento cu nan tin den un otro pais. Tin 10% di studiante procedente di Alemania cu ta studia na WUR.
Ana Lopez Contreras a duna un presentacion riba estudionan cu su departamento ta hasi riba biorefinery, caminda plastic ta wordo traha cu zeewier. Despues por a scucha presentacion di Rene Henkens riba Spaanse Lagoen na Aruba, caminda WUR a haña opdracht di ministerio di Asuntonan Economico di Hulanda cu ta engarga cu “rampgebieden” pa paisnan den Reino pa hasi un estudio riba diferente localidad na Aruba e.o. e brug nobo na Balashi y e Green Corridor. Nos por a compronde cu tur e proyectonan aki no ta hasi ningun daño na e naturalesa na Aruba. Despues tabata tin presentacion di Dolfi Debrot cu a duna di conoce cu Aruba por duna mas balor pa engrandece turismo door di enfoca riba buceo (duiken), cual lo por bira un niche market importante pa Aruba. E la menciona Mangel Halto como un tremendo luga pa duik. Tambe e la splica cu Aruba tin e oportunidad pa bira mas grandi como “Kennis Toerisme”. Por ultimo a ser menciona cu lo por planta matanan cu no mester di hopi awa, manera cactus y aloe, y tambe crea un mercado profesional di piscamento pa consumo local y te hasta pa exporta.
Despues di tur e presentacionnan Minister Yrausquin a duna informacion riba e desaroyonan cu ta tumando lugar na Aruba y tambe e vision di gobierno pa atrea mas compania y institutonan Hulandes pa Aruba. E la splika di tur e companianan cu ta activo na Aruba, manera Schiphol Group, TNO, Port of Amsterdam, Rietveld Academie, Iskes, Qredits, Pfixx y Nirint Shipping. Basa riba esaki WUR lo por evalua pa habri un filial na Aruba den futuro y bira un centro di conocemento pa region. Minister Yrausquin a gradici e gerentenan di WUR pa nan presentacion y a invita nan pa bai Aruba pa wak kico ta e posibilidad pa futuro pa traha hunto riba proyectonan.
Potretnan ta cortesia di Arubahuis