Prome Minister Eman, alabes Minister di Cultura tabatin un encuentro cu Minister Bussemaker di Enseñansa, Cultura y Ciencia di Hulanda, kende tabata na Aruba riba un bishita cortico di trabou. Presente na e reunion aki tabata staff di Minister Bussemaker, sr. Philipe La Reine, Presidente di Raad van Bestuur di Fundacion Museo Arubano, sr. Roly St. Jago, Presidente di Monumentenfonds, sra. Anne Witsenburg, Directora di Monumentenfonds. Durante e reunion Minister Bussemaker y Minister Eman a firma un acuerdo di cooperacion riba tereno di restauracion di monumentonan na Aruba.
Prome Minister Eman: “Den pasado caba nos a yega na cierto acuerdonan di cooperacion y palabracionnan concreto kico nos por haci hunto den Reino riba tereno di monumentonan. Resultado di esey ta cu e diferente fundacionnan na Hulanda a sostene Aruba. No solamente a crea vehiculonan financiero pa loke ta restauracion di monumtonan na Aruba, pero tambe a nace un cooperacion masha positivo cu a sostene Aruba enormemente riba tereno di conocimento.” Eman a bisa cu e mes tambe tin bon experiencia den haya conocimento for di stadsdeel Amsterdam. Cu nan a delibera con crea un sorto di NGO entidad cu por bira un siguiente pista pa loke ta restauracion di monumento y con restaura monumentonan y haci nan sostenibel unda ta posibel. “Nos a siña y intercambia hopi. Asina nos a lanta e fundacion ‘Renobacion Aruba NV”. Awor tin un di tres coriente hunto cu sector priva pa sigui restaura monumentonan na Aruba.”
Un punto specifico den e acuerdo firma ta cu un suma di placa a keda fiha pa financia restauracion di monumentonan. Eman: “Aki ta trata di financiamento di un suma di 500 mil euro na un interes hopi abou. Cu un suma igual nos a restaura caba dos monumento masha special denj pasado cu ta e watertoren na Oranjestad y esun na San Nicolas.” Eman a bisa di ta masha contento cu e acuerdo di cooperacion aki ya cu esaki ta yuda Aruba mantene su monumentonan cu ta di balor historico pa e isla. Den oranan di atardi Minister Bussemaker hunto cu Minister Eman a bishita e watertoren na San Nicolas.