No ta custumber di Minister di Salud dr. Alex Schwengle pa haci caso di atakenan fofo contra su persona, pero den e asunto di e forma cu a saca su expresionnan den Staten encuanto di su districto stima for di contexto el a dicidi di reacciona diaranson mainta pa aclarea su palabranan.
E mandatario no ta reacciona riba esunnan cu ta purba di causa polemica riba social media, y no ta gusta duna nan balor, pero e kier aclarea pakico el a haci cierto remarca como cu e ta sinti cu e mester a splica su mes miho. E ta agrega cu e ta haya hopi baho cu cierto hendenan ta gusta saca cosnan for di contexto pa motibonan politico, sea pa stroba maneho of pa jaloezie.
El a observa cu e forma di actua aki ta un señal di parti di fraccion di MEP basa riba contenido no tin nada riba su persona, y ta busca pa atak’e riba nivel personal pa wak si nan por logra caba cu su maneho. Hecho ta, segun Minister Schwengle ta splica, cu su curason y su consenshi ta limpi, y e ta haci su trabao cu amor y placer, pasobra e ta determina pa reenforsa loke ta bon y trece cambionan positivo y beneficioso pa comunidad di Aruba henter pa loke ta e tereno di salubridad y cuido, en general.
Den tur bario y districto di Aruba tin hende bon y hende menos bon, Minister Schwengle ta comenta, tin barionan bon y barionan cu pa influencia di cierto factornan ta barionan menos bon, tur bario y districto tin su retonan. Ta den e contexto di e caya unda el a nace y crece, den su tempo di hubentud, no full Savaneta, y no e caya ey den e tempo actual, el a referi na un “bario bruha”, causa pa circumstancianan specifico.
Minister Schwengle ta elabora cu den e caya cu el a nace y crece, esta su bario unda cu nan tabata hunga como mucha riba caya, tabatin un negoshi, Hotel Royce, cu tabata causa hopi molester, trece hopi problema y tabata haci bida sumamente peligroso pa e hubentud.
Na Hotel Roys tabatin hopi uzo y maluzo di alcohol, tabatin uzo di droga y rond di dje tabatin bendemento di droga, tabatin bringamento tur fin di siman; esaki no ta un ambiente sano, pero sigur un ambiente cu ta referi na dje como “bruha”.
“Tur sorto di maldad cu bo por imagina bo tabatin den e luga,” Minister Schwengle a subraya, “ningun momento mi a bisa cu e districto ta bruha, ami a lanta den un bario bruha, mi no ta tuma mi palabranan bek tampoco.”
El a comenta cu kisas ta su mesun fout cu e no a splica su mes mas amplio den Staten, y hendenan cu motivacion politico a kere cu nan lo por logra saca su palabranan for di contexto. No tabata na ningun momento su intencion pa insulta ningun hende y sigur no su districto stima.
E minister ta agrega cu como mucha tur dia e tabata wordo ofreci droga pa hendenan rond di e negoshi, y tur hende cu ta biba na Savaneta sa e peligernan cu e negoshi ey tabata presenta pa nan mes y nan yiunan.
E ta bisa Dios danki cu Hotel Roys ya no ta existi mas, y por nota tambe e cambio positivo y alentador den e ambiente cu ta reina den e caya/bario.
Minister Schwengle ta lamenta cu tin hendenan cu kisas ta kere e palabranan fofo di un meneer cu ta biba riba social media y ta uza palabranan baho y ta insulta hende riba nivel personal, y hasta ta menasa nan. E ta di opinion cu e palabra di e meneer aki sigur no ta bal mas cu e palabra di un Savanetero sincero.
Ta duel e mandatario cu shisheria di cierto hendenan ta haya asina hopi atencion y balor.
Savaneta ta un pueblo sumamente importante, e ta e prome capital di Aruba, segun Minister Schwengle, kende ta hopi orguyoso di su districto cu den su curason ta keda e capital. Savaneta a produci juffrouw y meneernan di scol, dokternan, hasta un gobernador, varios abogado, hues y hopi mas profesional; mas motibo ainda pa tur Savanetero ta orguyoso di nan districto.
E titular di salud a laga sa cu el a drenta politica pa logra algo pa su pais, no pa su mesun beneficio. Mas bien politica a cost’e na su salud, na e tempo balioso cu e lo por ta dedicando na su famia y tempo balioso cu e por ta dedicando na su pashentnan. E ultimo aki ta un di e motibonan tambe pa e mandatario a bolbe traha bek part-time.
“Mi ta kere mi por aporta y mi ta aportando na drecha salubridad na Aruba; mi ta hacie di mi curason,” Minister Schwengle a bisa. Hustamente e hendenan cu ta purbando di causa polemica ta esunnan cu a laga debe di 40 miyon den lotto y a laga shete miyon florin ta “flota” cu ningun hende sa unda el a bay ni por comproba cu el a wordo horta, e conclusion si ta cu e maneho tabata hopi malo; y p’esey mes nan lo ta rabia y ta purba di ataca e caracter di e minister.
Minister Schwengle a bisa enfaticamente cu su caracter no por wordo kibra pasobra su caracter ta fuerte y su consenshi ta limpi, y p’esey mes e no ta tuma cosnan asina di ningun hende.
Finalisando e minister a laga sa cu tur hende por “touch” e pero no su tata y e taki di famia di Domininico Schwengle. Esey ta algo cu e no ta acepta, e ta stima su tata, kende ta un homber drechi y trahado. “Keda leu di mi famia, ami ta politico y ningun hende mas,” el a conclui bisando.