Minister di Salud Publico, cuido di nos grandinan y Deporte tabata entre e oradornan durante di e di prome Mental Health Awareness Conference organisa recientemente. E mandatario encarga cu e cartera di salud publico a expresa su mes na un forma sincero y cla. El a bisa cu desde añanan 70 a cuminsa cu e proceso pa crea miho oportunidadnan y servicionan pa personanan y nan famianan cu tin mester di e sosten pa cu salud mental, sinembargo a pasa den un trayectorio di añanan di analisis y trabao duro, pero awo a yega e tempo pa “haci” y hiba e servicionan y cuido na un nivel mas halto.
Minister Schwengle a declara cu denter di dos siman lo tin e firmamento di un “Memorandum of Understanding” (MOU) importante, unda cu ta pone e parti di cuido mental bao di un fundacion, cual lo traha di cerca cu e “veld”, cu Departamento di Salud Publico (DESPA) y Ministerio di Salud pa cu maneho, y lo traha cu AZV pa loke ta e parti financiero.
Minister Schwengle tabatin elogio pa e organisadornan di e conferencia, esta Fundacion Jordan Ling y Dr. Horacio E. Odubero Hospitaal (PAAZ). Tabata un tempo oportuno pa organisa e conferencia y ta di spera cu e ta wordo organisa mas biaha, otro aña mes caba, el a expresa. Ta importante pa papia di salud mental, ta importante pa realisa cu nos tin problema mental na Aruba, aunke tin e tendencia di sconde, core p’e y haci manera cu e no ta existi, Minister Schwengle a bisa, agregando cu hustamente e custumber aki, di trata salud mental como un tema “taboo” ta stroba e caminda pa recuperacion.
El a bisa cu esaki ta un tendencia cu no ta algo unico pa Aruba, pero ta asina na hopi pais rond mundo y a bira tempo por lo menos na Aruba pa kibra e taboo y no tene berguensa pasobra problemanan mental no ta mara na placa, rasa, ni situacion social. Problema mental no ta mara na nada y tur hende por haya nan mes cu un problema mental, el a subraya y mester traha hunto, sin berguensa y busca na un forma pro activo y efectivo pa logra tin e instrumentonan necesario na nan luga y disponibel pa por yuda e pashentnan y nan famia.
Minister Schwengle a conclui cu e sigur ta convenci cu ta bay logra cu e structura nobo y un determinacion grandi pa yega na e cuido desea y necesario. Minister Schwengle a anuncia cu su presentacion tambe lo ta disponibel riba su pagina di Facebook pa comunidad por mir’e.