Dokternan cu ta “desfunciona” (no ta haciendo nan deber manera mester ta) y dokternan cu ta trahando ilegal, como tambe centronan di beyesa y otro individuo y negoshinan cu ta eherce practicanan peligroso y ilegal, lo bay sinti e consecuencianan di loke nan ta haciendo. Esaki Minister di Salud Publico, Maneho di nos Grandinan y Deporte, dr. Alex Schwengle a laga sa durante di un encuentro cu prensa, referiendo na e cambionan grandi cu lo bin den e area di salud publico cu e implementacion di Inspeccion di Salud segun leynan estableci.
Inspeccion di Salud ta resorta bao di liderazgo di mr. Dorylee Lopez-Peña y e departamento den un aña di tempo mester crece for di 2 persona pa 25, kende lo tin un nivel di educacion HBO of mas halto. E ekipo fuerte di Inspectie lo tin mas forsa pa haci investigacionnan y lo investiga y bin cu conclusionnan mas rapido cu e division di Inspectie cu a conoce te cu awo. For di januari 2017 pa dilanti lo cuminsa nota cambionan grandi pa cu e departamento aki.
Inspectie Volksgezondheid Aruba ta depende hopi di kehonan ricibi for di comunidad y tin algun caso pisa andando cu no a keda cla ainda. Minister Schwengle a agrega cu e investigacion di algun di e casonan di dokternan trahando ilegal ta hasta den man Ministerio Publico.
E mandatario a subraya cu cierto parti di e eliminacion di practicanan ilegal y peligroso ta cay bao di e mesun comunidad cu ta haci uzo di e servicionan aki. Minister Schwengle a haci un apelacion urgente y serio na comunidad pa stop di haci uzo di curanderonan cu ta haci abortus cu hanger y salonnan di beyesa cu ta haci tratamento di serum, entre otro. El a splica cu e tratamento por ehempel di serum, di cual ta wordo bisa cu e ta haci e “lashinan” of “rimpels” disparce ta un tratamento cu por resulta den enfermedad impactante y horibel manera hepatitis.
Bo no sa con importante higiena ta na e centronan aki, pero ta laga e salon di beyesa tuma sanger, bir’e den un beker di glas te ora cu e forma clompi pa despues nan tuma e awa geel cu ta keda pa uz’e den e tratamento. Esaki ta un practica cu ta hopi peligroso, Minister Schwengle a bisa enfaticamente. Por pone 1000 trahado pa Inspectie, pero tanten cu comunidad mes ta kier haci uzo di e practicanan ilegal aki, Inspectie no ta bay por stop nan tur y pa semper.
E titular di salud a conclui bisando cu Inspectie lo yuda trece respet y control pa cu practicanan ilegal, pero pueblo tambe mester admiti, mester yuda den e proceso y stop di haci cosnan cu por facilmente forma un peliger pa nan salud, cual na fin di dia hasta por conduci na morto.