Frank Rijkaard, e famoso futbolista y entrenador Hulandes tabata na Aruba y a probecha su bishita pa e por a duna un clinica na e futbolistanan di Aruba. E hecho cu awor LIFIDA ta resorta bao di Arubaane Voetbal Bond (AVB) ta pone cu regularmente mester haci esfuerso pa ofrece guia na e entrenadonan y na e futbolistanan mes.
“E intencion ta pa Arubaanse Voetbal Bond organisa mas di e tipo di clinicanan aki cu e tipo di personalidadnan manera Rijkaard, pa asina e muchanan por haya mas animo, pa nan por haya mas empuhe pa nan por sigui den futbol”, asina Richard Dijkhoff, Presidente di Arubaanse Voetbal Bond (AVB) a duna di conoce.
Esaki ta demostra e caminda cu AVB kier cana pa crece y desaroya futbol na Aruba. E clinica a tuma luga dianan 7 y 8 di December na Centro Deportivo Frans Figaroa. Banda di esaki, Minister di Salud y Deporte Alex Schwengle a duna di conoce cu mirando cu Frank Rijkaard tabata un futbolista hopi popular, a dicidi di organisa e clinica aki pa e muchanan. “Esaki tin di haber cu nos empeño pa stimula calidad, unda cu nos kier pa un club tin un cierto exito, pero e clubnan tin un bida largo”.
AVB su tarea ta pa hiba un maneho mas duradero pa e mundo di futbol aki na Aruba, mirando cu futbol ta te ainda e deporte di mas grandi. E sosten di Gobierno hunto cu Subsidie Commissie lo ta pa percura pa no solamente pa Arubaanse Voetbal Bond, pero pa tur bond traha mas eficiente posibel, e mandatario a subraya.
El a sigui bisa cu e bondnan mester haci bon uzo di e fondonan cu tin como tambe di e recursonan humano. Pa cu e ultimo aki mester di educacion. Pesey ta organisa e clinicanan aki pa hiba e nivel di nos futbol un tiki mas halto, el a remarca.