Minister Dowers ta reuni cu ministernan Navarro y Duncan tocante Warda Costa

E ministernan di husticia di Corsou, Aruba y Sint Maarten a reuni recientemente na Corsou pa trata asuntonan di Wardacosta (Kustwacht). Ministernan Nelson Navarro di Corsou, Roland Duncan di Sint Maarten y Arthur Dowers di Aruba a wordo invita pa e presidente di e presidium, M. Ganzebeek pa un reunion tocante e colaboracion di Wardacosta den Reino.E topiconan cu a wordo discuti tabata, entre otro, e establecimento di reunionnan structura entre e ministernan di husticia di Reino cu e minister di defensa Hulandes, basa riba articulo 14 di Rijkswet pa Wardacosta. E minister di defensa Hulandes ta encarga cu e maneho di Wardacosta. Un di e necesidadnan cu ta existi ta un investigacion tocante funcionamento di e organisacion.
Pa bon cooperacion den un organisacion na nivel di Reino manera Wardacosta, segun e ministernan, ta esencial pa reuni regularmente y fiha atencion riba e necesidadnan di e paisnan, cual por ta diferente dependiendo di e pais.
Un grupo di trabao lo wordo institui pa e ministernan di husticia pa compila e necesidadnan di Corsou, Aruba y Sint Maarten pa mehora e efectividad y eficiencia di e funcionamento di Wardacosta.
E ministernan di husticia di e tres islanan a expresa cu nan ta spera di por intercambia idea den un futuro cercano cu e minister di defensa Hulandes tocante Wardacosta.
Sigui e progreso y desaroyo di diferente proyecto, como tambe actividadnan diario di Ministerio di Husticia y Enseñansa bishitando  dowersblg www.arthurdowers.com/dowersblog.