Oposicion completo den Parlamento a entrega mocion di desconfianza contra minister Arthur Dowers. Cu esaki minister Dowers ta bira e minister cu mas mocion di desconfianza den historia di pais Aruba, segun Sra. Evelyne Wever- Croes. Ademas, ta prome biaha desde 2009 cu 9 miembro di Parlamento ta firma e mocion di desconfianza. E mocion aki ta den e relacion cu e ola di criminalidad y insiguridad cu ta sigui asota nos comunidad y cu a tuma dimencionnan sumamente preocupante y inacceptabel.
E maneho di e minister actual no ta funcionando pa brinda solucion efectivo pa trese bek siguridad y trankilidad den nos comunidad. Lamentablemente e minister cada bes ta cai den ripiticion den defensa di su maneho deficiente, pues no tin bista riba mehoracion concreto.
A base di esaki oposicion COMPLETO a entrega un mocion di desconfianza contra e minister di husticia. E mocion a wordo rechaza cu 11 voto na fabor di minister Dowers y 9 votos contra minister Dowers. Ta prome biaha cu ela haya un votacion asina cerca di un decision di confianza.